LAA 72 - Kathara Bible (BSI)

Awunga wui vang Seihā

¹ O Varivara, nawui mashun awungali milu, kala nawui khangarong chi wungnao mayarali milu!

² Khamashung eina nawui mibingli, mashun eina nawui kachāmabingli bichar samiranu.

³ Phungreibingna mibingwui vang mataikasang phungrāmiranu, kaphungbingna khamashung phungrāmiranu.

⁴ Kachāmabingwui vang ana nganingmiranu, khavātabingli kanshokmiranu, kala rekakharekabingli sākachupranu.

⁵ Zimik kachāng leilakha eina tangda, thot saikorali vāpeida ali okpeiranu.

⁶ Katatmicham kaje khawotungli kazing rokatā thāda, zingrotna okathuili tara̱ chaikharor thāda, ala chikathā ngasāranu.

⁷ Awui atamli khangarongna shokpemranu, kala kachāng makhalei eina tangda chingri kahai leichingranu.

⁸ Yirei akhawui eina khangatei akha vāshungda, Kong chiwui eina thuilaga okathui akatang eina tangda ana mungranu.

⁹ Awui yangkashebingna ali khorumranu, kala athumna chifa malekranu.

¹⁰ Tarshish kala shamadru ngaleiwui awungabing ali shai miranu. Sheba eina Sebawui awungabingna lemmet khuirāranu.

¹¹ Awungabing saikora ali khorumranu, miyur saikorana ali otram ngatha̱ranu.

¹² Kaja khavātana khangakao tharan ana ali kanshokmi, khangachon makhalei kachāmabinglila kanshokmi.

¹³ Khangazana, khavātabingli ana lumashana, kala khavātabingwui manglā huimi.

¹⁴ Rekkakharek kala khangashaobingwui eina athumwui manglā ana ngatangmi; awui miktāli athumwui ashee aman saklaka.

¹⁵ Ali okpeimeiranu, Shebawui sinā ali miranu! Awui vang seihā sachingranu, kala awui vang sokhami langpongda pomirānu!

¹⁶ Ngalei chili makhavāta mā samphangranu, kaphungtonbing theishiraina pemranu; chiwui athei Lebanonwui tharanu; Luiwui khawo thāda keinungwui eina mibingla mayāsangranu.

¹⁷ Aming leichingranu, zimik leilakha eina tangda awui ming zatchingranu! Awui ming eina mibing athum khalatta soranu, yur saikorana ali somi kahaia horanu.

¹⁸ Israelwui Vare Proholi soranu, amāngna matakhak kahai ot sai.

¹⁹ Awui tekmateilak kahai mingli sochingranu, awui tekhamatei okathui hupta pemranu, Amen, Amen!

²⁰ Jessewui naomayara Davidwui seihā kasā kuphaira.