LAA 69 - Kathara Bible (BSI)Ngachonmi khavai Khangakao 1 Ili huimilu, O Varivara! Kaja tara̱na akahung kāshunghaira. 2 I pheinganin makhalei rāhukli tāzanga; I kathuka tara̱li zanghaoda, tara̱ khangaphaona ili kheirora. 3 I chapsānhaira, iwui kharokla thenghaira; Vareli khangaraiwui vang imikla tangmanghaira. 4 Maram maleila ili yangkashebing ikuisamli chungmei; kapikta ili khangashaobing, ili shimān ngasakki kaji athum panglaka. Ina maleekakhui ara ina runphalungrala? 5 O Varivara, iwui mangkhama̱ nana thei, Ina salāng kahai nawui eina thumkahai maleimana. 6 Nali kachihānabingli iwui mangā eina makhayak ngasakalu, O saikorawui Proho VARE; nali kaphābingli iwui mangā eina mamaishi ngasakalu, O Israelwui Vare. 7 Kaja ina misui kaphung hi nawui vangna, chiwui vang eina khayā khamalāna mai pemhaira. 8 Ichinā ngarāli kha̱mi thāhaira, pharākhangarum ishava̱wui ichina ngarāli zakmai makathei thāhaowa. 9 Kaja nawui shimwui vang ningkasangna mei thāda chuihaira, kala nali kazeibingwui kazei chi iwuitungli tāhaira. 10 Khumda imanglā hamsang khangasak tharan, chi iwui khayon phākhavai ngasāhaowa. 11 Ina ngavai khavai porākachon kasā tharan, athumwui vang I chansā khavai ngasāhaowa. 12 I hi ngaveili kapambing ngazeknganao khavai sāthuihaowa; kala khamaripabingna ili laa phoksanga. 13 Kha O Proho, iwui vanga, iwui seihā kasā nalina. Nana mayākapai atamli, khavāt makhalei makhangachei leikashi eina ngahānkāmilu. Nawui makhangachei ngachonkhami eina 14 rāhukli tākazangwui eina ili kanmilu; yangkashebingwui eina kala kathuka tara̱wui eina ili kanmilu. 15 Ra̱phongna ili mangaphaoror ngasakalu, lah kathukanala mamayuisang ngasakalu, lah chomnala iwuitungli khamor mashungkhamhairanu. 16 Ngahankāmilu, O Proho, kaja nawui makhangachei leikashi chi phālaka; nawui makhavāta lukhamashan athishurda, ili ngareira milu. 17 Naraowui eina mai mangareithuimi haialu; kaja I chotchāngdalei, ili thākta ngahānkāmilu. 18 Ili rānganaimilu, ili kahuimilu, ili yangkashebingwui eina ningkhān ngasakmilu! 19 Iwui khayonkhamāng, iwui khayākhamala kala iwui maikashila nana thei; iwui yangkashebing nana theisera. 20 Zeikakharuina ining ngayānghaira, chiwui vang eina I chihān khavai maleithura. Ili lumashanmi khavai vang phai, kha akhanida maleimana; kala ninglum khavai phai, kha ili akhala masamphangmana. 21 Zātwui vang athumna ili kathiri mi, kala iwui ra̱chanwui vang mangkhavai kathurra̱ mimanga. 22 Athumwui zākhavai tablena khalatta khalen ngasāranu; pha̱kaphayā zātkhānala khalen ngasāranu. 23 Athumwui mik tangmangmihaida matheiranu, athum kashān nganukkapopchingranu. 24 Nawui malungkhavāt athumwuitungli heirorlu, nawui malungkathuina athumli ngaphankhuiranu. 25 Athumwui rāmrah ngachakyānghaoranu, athumwui kachonshimli mi khipākha mapamranu. 26 Kaja nana tandi mikahaiya chili athumna rekhareka; kala nana khamā za̱mi kahaia chili athumna mataida khanang ngasaka. 27 Athumli tandiwuitungli tandi ngarormilu; nawui eina athum chihokhami masamphangranu. 28 Athumli kharinga lairikwui eina ming sāshimithaoranu; athum khamashungabingwui alungli aming machanaranu. 29 Kha iva saza̱haida ngasheida lei; O Vare, nawui huikhami china ili kajuitungli haimiranu! 30 Varewui mingli laa eina na masotmira; ningkashi eina ali ina reingasakra. 31 Hina mukkāli lāngda Proholi ningyāng ungngasakra; angachee kala asho kakā chilila lāngmeida. 32 Rekkakharek samkaphanga china theida mathānranu; Vareli kaphā nathum, nathumwui wuklung china ning mathukranu. 33 Kaja khavātali Prohona shāmi, kala narhaida khalei akhalattawui mili machinmahaimana. 34 Kazing eina ngaleina ali soranu, ngayi kala chiwui alungli ringda khalei saikorala. 35 Kaja Varena Zionli huimira, kala Judahwui keinung sakāluishitra; kala awui raobingna chili pānda chi khuira; 36 awui raobingwui naomayarana shimlui khuira, kala amingli leikashebingna chili pānra. |
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
Bible Society of India