LAA 63 - Kathara Bible (BSI)

Vareli Kahon

¹ O Varivara, na iwui Varena, ina nali phai; imanglāna nali ra̱changda; katheng lamhāngli tara̱ makhalei thāda imanglā vānhaida nali phai.

² Chiwui vang nawui kathar shimli ina yangda nawui tekhamatei kala pangshap ina thei.

³ khikhalajila nawui makhangachei leikashi mirinli phāmei; imorchaina nali masot mira.

⁴ Chiwui vang ina ringlakha eina tangda nali sora; ina ipāng khāngkāda namingli ngakaora.

⁵ Imanglāna athao eina angating kashai thai, kala khamathāna imorchai eina ikhamorna nali masot chigata;

⁶ Ina iwui pettungli nali phaningkhaung, kala ngayāshongwui atamli nali khamachuk tharan;

⁷ kaja nana ili ngachonkhamena, kala angachāng khaya̱li khamathānwui vang ina laa sai.

⁸ Imanglāna nali shaitita; nawui yāpangna ili singmi.

⁹ Kha imanglā shimān khavai kasā athum okathuiwui kathuka chili zangra;

¹⁰ athumli raighaiwui pangshapli horsangmira, athum ramfawui shaikhavai ngasāra.

¹¹ Kha awungana Vareli mathānra, awui ming kasinga saikora tekmateira; kaja kakapika miwui khamor khāmmihaora.