LAA 62 - Kathara Bible (BSI)

Varena Ngākhamili Ningkhanganung

¹ Varewui vang māng imanglāna chingri eina ngaraili; awui eina iwui huikhami rai.

² Amāngna iwui lunghārna kala huikhamena, iwui raipanna; I mangatha̱lakmara.

³ Kongluinanai khalei raipam, pithuinanai khalei hokhaithing kathā mi chili, nathumna ali karankha shaopamfarakhala?

⁴ Awui khangampamwui eina ngakhuntā khavaimāng athumna ngarāna. Khangui otsakli athumna ringphai. Athumna khamor eina somi kha alungshong athumna khonshiya.

⁵ Varewui vang māng imanglāna chingri eina ngaraili; kaja iwui kachihān awuili lei.

⁶ Amāngna iwui lunghār kala iwui huikhamena, iwui raipanna; I mangatha̱lakmara.

⁷ Iwui khayā kala huikhami Varewuili lei; iwui pangshapa lunghār, ngayin khavai Varena.

⁸ O mibing, ali atam kachida shitsangchinglu; nathumwui ning ali milu; Vare hi ithum ngayin khavaina.

⁹ Khangazana mibing khaksuikha kathāna, kashang-khareibing thankhanguiana; khān tamakha athum khāngkār kai; athum ngarumserlaga khaksuikhali ngavengmei.

¹⁰ Minamda kakhuili akachanga masaalu, likazāli machihānphāphaalu; lan mataikasang tharan, naning chili mahaialu.

¹¹ Varena hāngkhashiya; Ina shākhani shiya: kaja pangshap Varewuina;

¹² kala O Proho, makhangachei leikashi nawuina. Kaja miwui otsak athishurda nana hanmiya.