LAA 60 - Kathara Bible (BSI)

Ngatangmi khavaiwui Seihā

¹ O Vare, nana ithumli horhaida ithumwui raipanbing sātekmihaira. Na malungvāthaowa; iyavo, ithumli kahuimiluilu.

² Ngalei nana nganuk ngasaka, sākakhaila nana sakhaihaira; kaikahai chi chiphomilu, kaja chi nganukhaira.

³ Nana nawui mili kasaka ot kachungkha phungngasakhaira; nana ithumli mangkhavai zam mida china ithumli nganing ngasaka.

⁴ Nali khangacheebingwui vang nana philān shunmihaira, malāwui eina chili kuimarei khavai.

⁵ Chithāda nawui khalumali khāngkhui khavai, nawui yāpang eina khayuiya mida ithumli ngahānkāmilu.

⁶ Varena awui katharapamwui eina hānghaira: “Mathānthup eina ina Shechem ngayarkhaira kala Succothwui tampāk ngayarshokra.

⁷ Gilead iwuina, Manasseh iwuina; Ephraim iwui kuihona; Judah iwui khānthingna.

⁸ Moab iwui pāng mazik khavai khongsaina, Edomli iwui pheihop haivai; Philistiali ina raiyotlaa vaowa.”

⁹ Raipan sākahai keinungli khipāna ili khuiungrakhala? Edomli ili khipāna thānvārakhala?

¹⁰ O Vare, nana ithumli horkahai maningmala? O Vare, nana ithumwui raimili mangasomimana.

¹¹ Iyavo, yangkasheli yuikhavai ngachonmilu, kaja miwui khangachon aremana.

¹² Vareli ngasoda ithum pinglak eina sāra; yangkashebingli pheinai sāki kaje chi ana.