LAA 58 - Kathara Bible (BSI)

Makhayāli Danti Mikhavai Seihā

¹ Khamungabing, nathumna khamashung eina hukhum sāla? Saikorali mashungrik eina bichar sāla?

² Maningmana, nathumwui ningli makhamashungmāng ngarāna; okathuili, nathumwui pāngna sākashi ot sai.

³ Makaphābingna naopamwui eina apong ngateida zata, athumna kapharā eina thuida khayon sai, kakapiktui matuiya.

⁴ Athumna phara̱wui hu thāda hu phunga, leijanākhok thāda mashāmimana,

⁵ chithāda suikatheibingwui akhonla I mashāmana lah kathembingwui kahola mashāmana.

⁶ O Vare, athumwui khamorli hā sātekmihaolu; O Proho, kapanga kazingkha̱naobingwui hārana sheitāmihaolu!

⁷ Longthui kahai tara̱ thāda athum shimānhaoranu; khawo thāda athumli naikharothaoranu kala ngahuihaoranu.

⁸ Khripaili khorpungla kathi thāda, kachāng makapei nao zimik kahor matheilak kaji thāda athumlila chitharanu.

⁹ Athumna chi matheiranglakha, athumli khawo thāda katattāhaowa; athumna ringda leilakhala, Varewui malungkhavāt alungli, athumli phanthuihaoranu.

¹⁰ Athut kakhui chi kathei tharan, khamashung-khangarongana mathānra; makaphaawui asheelungli aphei pheora.

¹¹ Mibingna, “Khamashung-khangaronga miwui vang sāman leikachangkhata; okathuili bichar sakhame Vare leikachangkhata,” da hāngra.