LAA 57 - Kathara Bible (BSI)

Ngachonmi khavai Seihā

¹ Ili khalumashanmilu, O Varivara, ili khalumashanmilu, kaja imanglāna nali ngayina; nawui angachangwui khaya̱li, sākashimāna siphan zingrot mavānranglakha eina tangda, ina ngayinra.

² Juikhamataia Vare, awui khangarān ili ungshungkhame Vare chili ina ngakaowa.

³ Ana kazingram eina chihorāda chieina ili huimira, ili naikakazambingli ana maishi ngasakra. Varena awui makhangachei leikashi kala ningtongda shitkasang chitheira!

⁴ Miwui naomayarabingli kārāmda kashaia kazingkha̱bingwui alungli, ina ngayaipama; athumwui ahā kazei kala malāthing thai, athumwui male kazana raighai thai.

⁵ O Varivara, kazing atungshong sochikatranu! Nawui tekhamatei okathui peiranu.

⁶ Iwui chonsang khavai athumna khalen sangda; ining suitāhaowa, iwui shongfali athumna chom chuiya, kha athum khalatta chili tāzanga.

⁷ Ining mangacheimana, O Vare, ining mangacheimana! Ina laa sāda nimshimri ngasakra!

⁸ Thuilu, imanglā! Thuilu, O sipa, tingteilā! Ina kazing kathangli mathotra!

⁹ Nali mibingwui alungli ina ningkashi mira, O Proho! nali yurbingwui alungli ina masotlaa sāra.

¹⁰ Kaja nawui makhangachei leikashi kazingramli reilaka, nawui ningkatong muiyā kāshunga.

¹¹ Kazingram atungshong sochikatranu, O Vare! Nawui tekhamatei okathui saikora peiranu!