LAA 54 - Kathara Bible (BSI)

Yangkashebingwui eina Ngākmi khavai Seihā

¹ O Vare naming mangā eina ili kahuimilu, kala nawui pangshap eina ili mashun hāngsangmilu.

² O Vare, iwui seihā kasā shāmilu; ikhamor eina kapo kashāmilu.

³ Kaja achei makathei mibingna ili mamayāmada ngakarthuihaira, sakashebingna imanglā khuikhavai phai; Vareli athumna matheimimana.

⁴ Yanglu, Vare iwui ngachonkhamena, Prohona imanglā yangkhamena.

⁵ Iwui yangkashebingwui zakkashi eina ana athut khuimira; nawui ningkatong chieina athumli shimānchao ngasakhaolu.

⁶ Mingairareo kachigat eina ina nali pha̱phayāra; namingli ningkashi ina mira, O Proho, kaja hi kaphaana.

⁷ Kaja kakhanang kachiva̱wui eina nana ili khāngshokmi, kala iwui yangkashebingli khayui chi imik eina theihaira.