LAA 53 - Kathara Bible (BSI)

Miwui Makhayā

¹ Mangkhama̱na awui ningli “Vare maleimana” da hānga. Athum chiya kateikazā, ningkakachai khayonkhamāng ot sai, kaphā kasā akhala maleimana.

² Varena kazingramwui eina yangtai mi saikorawuitungli; Vareli khangachee thangkhama mazanglikhala da.

³ Athum kongluiserhaira; athum saikora ngaraichāda mamashungsermana; kaphā kasā khipākha maleimana, akhala maleimana.

⁴ Vareli khangakao makhalei, iwui mibingli khamui thāda kashaibing, makaphā ot kasā athum, theishingkakhui maleimala?

⁵ Athum chili ngacheeshun eina lei, chikathā khangachee mashoklakrangli! Kaja makaphā athumwui ara̱kui, Varena chaikathān ngasakhaora; athumli khayak ngasakra, kaja Varena athumli mamayāmana.

⁶ Iyavo, Israelwui vang ngatangkhami Zionwui eina rāsi kaja! Varena awui mibingwui lan hankhami tharan, Jacobna ringphāra, Israelna mathānra.