LAA 52 - Kathara Bible (BSI)

Varewui Bichar Kala Lukhamashan

¹ O pangshapa, khisāda varekathei mili zakkashi kasāwui vang langsokhala? Langpongda nana

² shimān khavai sai. Namale kazana kuisighai thai, yankasai ot kasaa na.

³ Kaphāli lāngmeida nana makaphāli leishi, khamashung khamatuile kakapik chungmei.

⁴ Zakshi khavai tui kachiva̱ nana leishi, O mikhanama male!

⁵ Kha Varena nali katang mavaila sakhaichanghaora, nawui kachon shimwui eina ana shimenkhuida nali serkazamhaora, kharingabing okthui khavai pamwui eina ana nali phurshokhaora.

⁶ Khamashungabingna theira, kala ngacheera, kala ali mana̱rorda hāngra,

⁷ “Yanglu, Vareli awui ngayin khavai masākhangaia, kha awui makhavāta lanli shitkasanga, kala awui lanli ngayin khavai phāthui kahaia chi!”

⁸ Kha iva Varewui shimli khamateka oliverong kathāna. Varewui makhangachei leikashi chili ina katang mavaila shitsanga.

⁹ Ina nali ningshichingra, nana sāmi kahai chiwui vang. Naming ina vaora, kaja hi kaphā otna.