LAA 51 - Kathara Bible (BSI)

Pheomi khavai Seihā

¹ O Proho, nawui makhangachei leikashi athishurda, ili lumashanmilu; nawui makhavāta lukhamashan athishurda iwui sāyon kahai sāshimitmihaolu.

² Iwui makaphā makhayā saikorawui eina pheomilu, kala iwui moreiwui eina tharmilu!

³ Kaja iwui khayonkhamāng ina thei, kala iwui morei iwui mangāli leichingda lei.

⁴ Nali, namāngli ina morei sāhaira, kala nawui mikyanli makaphā chi sāhaira, chieina nana tuitak tākhami chi mashunga kala nawui bicharli shāt maleimana.

⁵ Yanglu, moreilungli ili ishava̱na vaikhui, ili khayonlungli pharai.

⁶ Yanglu, nana alungli khamashung chi ningchānga; Chiwui vang eina khangathuma wuklungli ili awor tamchitheimilu.

⁷ Maharnā eina pheomilu, chieina I tharhaora; ili pheomilu, chieina I horāmli charmeihaora.

⁸ Ili ringkaphā khamathān eina chipemilu; nana sātekmi kahai ara̱kui chi mathānranu.

⁹ Iwui khayonkhamāng pheomiserhaida, iwui morei saikora kha-yangkheimilu.

¹⁰ O Vare, ili wuklung kathar semsangmilu, kala kadhara kala khamashunga manglā sangmilu.

¹¹ Nawui pamwui eina ili makhuithuimihaialu, kala nawui kathara Manglā iwui eina makhuimihaialu.

¹² Nawui huikhamiwui ringkaphā chi ili sangmilu, kala ili kahāng nganāngairareo kahai ning sangmilu.

¹³ Chieina nawui apong khayon kasābingli ina tamchitheira, chieina morei kaphungbingna nali latungra.

¹⁴ O Vare, ashee eina khangui kasāwui eina ili kanshokmilu, ili huikhame Vare, kala imalena nawui ngatangkhamiwui laa pangda vaora.

¹⁵ O Proho, nana imorchai makā ngasakmilu, chieina ikhamorna nawui masot chi chitheira.

¹⁶ Kaja pha̱kaphayāli nana mamathānmana; Ina rikkatā kachigat chigatra jilala nana ningyāng maungmara.

¹⁷ Varena khuisangkapai pha̱kaphayā chiya, yurkahaiya kala kakhanang manglā chili O Vare, nana maningkachaimara.

¹⁸ Nawui ningyat atamli, Zionli kaphā sāmilu, Jerusalemwui phākho sakāmiluishitlu,

¹⁹ chieina khamashung pha̱kaphayāli nana ningyāng ungra; rikkatā kachigat, kala katonga rikkatā kachigat kasali; chieina nawui hanphutli mukkābing chigatra.