LAA 45 - Kathara Bible (BSI)

Wungnao Ngalā Shakzāt Laa Kaphok

¹ Tuipong khamathā akha iningli malaotha̱ya; ina awungali laa phoka; imale kapikakhuiawui kolom thai.

² Mibingwui nao ngachaili na mathāmeithuiya, namorchaili lukhamashan heirora, chiwui vang Varena nali mashimānda somi.

³ O pangshapa, nawui tekhamatei, khangamkharei eina ngasoda nawui raighai kashānli hokthānglu.

⁴ Nawui khangamkharei eina khamashungwui vang, kala mashun ngākmi khavai khayuia sāda mangāshong vālu; nawui yāpāngna nali khangachee otsak tamchitheiranu!

⁵ Awungawui yangkashebingwui malungli nawui malāthing zanlaka; miyurbingna nawui mangāli pitai.

⁶ Nawui kathara wungpamkhong mashimānda mashimānla lei, nawui khānthing

⁷ khamashungli nana leishi kala makaphāli yangkharinga. Chiwui vang eina Vare, nawui Varena nali khamathānwui thao chi ngasotnaobingli lāngmeida nali neomihaira,

⁸ nawui wungsārila nganamkaphā myrrh, aloe kala cassia thungthunghai. Mafahā eina sākahai konungwui eina tingteilā huida nali mathān ngasaka;

⁹ awungawui naongalāva̱ ngarā, nawui khayākakā achon ngarāwui ngachaili zanga, awungva̱ chi Ophirwui sinā eina shaksāda nawui yāshong nganinga.

¹⁰ Nganālu, O naongalāva̱, chukmajalu kala nakhanā nāshunglu; nawui mibing kala navāwui shimkhur malaihaolu;

¹¹ kala awungana nawui khamathā chi ningchāngra. A nawui akhava ngasāhaoda, ali khorumlu.

¹² Tyrewui mina nali lemmetyur eina suira, shāngmeikap kaji mibingna lan ayuryur singlaga.

¹³ Wungnao ngalāva̱ sinā rukkasang sāri ngavaida awui kāli ngavaipama;

¹⁴ machu kachungkha sākasanga kachon ngavaida awungawui mangāli thānvai; kachingva̱ awui ngasotnaobingna ali ngasoda thānlaga.

¹⁵ Awungawui konungli athumna kazang tharan, ringkaphā khamathān eina athumli thānkhuiya.

¹⁶ Navā ngarāwui mahut nathumwui naongarāna shinra; nana athumli okathui saikorali wungnaobing sāngasakra.

¹⁷ Ina mithot saikorali nawui ming phaningung ngasakra, chithāda mibingna mashimānda mashimānla nali masot chigatra.