LAA 44 - Kathara Bible (BSI)

Ngākmi khavaiwui Seihā

¹ Ithumwui khanā eina shāhaira, O Vare, Ithumwui avā ngarāna ithumli hanghaira, achalakha athumwui atamli nana sākahai nawui otsak:

² nana yurbingli nawui pāng eina kashamshoka, kha nana nawui mibingli lingsanga; yurbingli nana khanang ngasaka, kha nawui mibingli ningkhān ngasaka;

³ kaja athum khalattawui raighai eina ram chi yuikakhui maningmana; athum khalattawui pāngthei einala yuikakhui maningmana; kha nawui yāpang pāngthei eina, kala namaiwui kahor chinana; kaja nana athumli ningyāngunga.

⁴ Na iwui Awunga kala Varena, Jacobwui vang rai khayui nana tharchisina.

⁵ Nawui mangā eina yangkashebingli ithumna namtai; namingwui mangā eina ithumna khangararbingli naitai.

⁶ Kaja iwui malāli shitkasang maningmana, iwui raighainala huimirarki kaji maningmana.

⁷ Kha yangkashebingwui eina nana ithumli huimi, kala ithumli yangkakharingbingli nana pa̱khangapā sangmi.

⁸ Varewuilungli ithum lāngsorāchinghaira, kala namingli ithumna mashimānda ningkashi mira.

⁹ Kha, nana ithumli horhaida chamalā ngasaka, kala ithumwui raimili ngasoda mavāmana.

¹⁰ Yangkashebingwui eina nana ithumli yāmngasakta; yangkashebingna rāngaponkhui.

¹¹ Taithatki kaja yao thāda nana ithumli sai, kala yurbingwui alungli ithumli yaoyānghaowa.

¹² Khikha makhaning aman eina nana nawui mibingli yorhaowa, athumwui vang aman chungdala mapomana.

¹³ Khongnainaona mana̱shi khavai; ithumli kuimareida khaleibingwui zeikhavai kala mana̱kashi samphang khavai nana sāmi.

¹⁴ Yurbingna meisum chān sākhavai, mibingna ngashan sānganao khavai ithumli sāmihaowa.

¹⁵ Langpongda iwui maikashi iwui mangāli lei, kala maikashina imai fakhamhaira,

¹⁶ khamashātbing kala zeikakharuibing, athutkakhui kala yangkashebingwui tui china.

¹⁷ Ithumna nali mamalailala, lah nawui tuingashit mayonlala saikora hi ithumwuitungli tāhaira.

¹⁸ Ithumwui ning mangacheimana, nawui pongwui eina ithumwui pheikār masa̱na̱ungmana;

¹⁹ chithālala ramfawui pamli ithumli nana sākachupta, kathuka tangkhamang eina ithumli farorhaira.

²⁰ Ithumna Varewui ming malaihaida makathei vareli pāng tāngthuihaiakha,

²¹ Varena chi maphāshokmarala? Kaja khangathum ningla ana thei.

²² Kha nawui vang ithumli langpongda sāthatpamda lei, kala taithat khavai yao thāda shānkhuihaira.

²³ O Proho, khisāda pihaokhala? Nakhalatta ngakarthuilu! Thuimilu! ithumli mahorchaomi hailu!

²⁴ Khisāda nana namai thumhaikhala? Khisāthuda ithumwui kachotkachāng kala ithumli rekakharek malaihaokhala?

²⁵ Kaja ithumwui manglā chifali ngakhorda; ithumwui phasā ngaleili nganarshānhaira.

²⁶ Ngakarthuida ithumli ngachonmi khavai ralu! Nawui makhangachei leikashi mangā eina ithumli kakhāngshokmilu.