LAA 42 - Kathara Bible (BSI)

LAIRIK II ( Laa 42—72 ) Raithā kahai Kaikhawui Seihā

¹ Chaona longkazata kongrāra̱ ningkachāng thāda, imanglānala nali ningchanga, O Varivara!

² Kharinga Varewui vang imanglāna Varewui vang ra̱changa, Varewui mai ina katharan atheirakhala?

³ Ngashun ngayā iwui chara̱na kashakazā sai, mibingna ili ngahānchinga, “Nawui Vare kali leikhala?”

⁴ Ina iwui ning kakhalā tharan, hibing hi phaningunga: yarui ashangvana phanit salakha ringkaphawui khavao kala ningkashiwui laasak eina ngasoda ina yaruili kathada ngayurzatsā, athumli kathada khorumshimli thānvāsā khala kaji.

⁵ Khisāda sifakhala imanglā! Khisāda iningli chingri mahaimakhala? Vareli chihānlu; kaja ina ali latluida masot chikatluira; iwui ngachonkhame kala iwui Vare.

⁶ Iwui wuklungli manglāna sifaya, chiwui vang eina Jordan kala Harmon ngaleiwui eina, Mizar Kaphungwui eina ina nali phaningunga.

⁷ Nawui tara̱ kaherkatāwui khangashumkhonli kathukna kathukli hoi; nawui tara̱ khangaphao kala khamalaona ili tumhaira.

⁸ Awui makhangachei leikashi chili Prohona ngashun kasoi; ngayā peida awui laana ili ngasomi, iwui ringkhavai Vareli seihā kasā eina ngasoda.

⁹ Ina Vare, iwui lunghārli hānga, “Khisāda ili nana malaihaokhala? Yangkashebingna rekakharekwui vang khisāda ina chapngachāzatrakhala?”

¹⁰ Thikhavai khamā iphasāli leihaoda yankakasaibingna ili zeilaga “Nawui Vare kali leikhala?” da hānga.

¹¹ Khisāda sifakhala, O imanglā, khisāda iningli chingri makahaikhala? Vareli chihānlu, kaja ina ali masot chigatluishitra, iwui ngachonme, kala iwui Vareli.