LAA 4 - Kathara Bible (BSI)

Ngachonmi khavai Ngazinwui Seihā

¹ Ina kaho tharan ngahānkāmilu, O iwui mashunwui Vare! Ina ringkashi tharan nana ili ngachonmi. Ili lumashanmida iwui seiha kasā kashāmilu.

² O mibing, ili karankha maishi ngasakpamrakhala? Arema tuili nathumna karankha leishifara kala kakapik phāfara?

³ Kha kaphā kasapali Prohona akhalattawui vang ngatei ngasakhaira kaji theilu; Ina Proholi kaho tharan ana shāmi.

⁴ Malungvātlu, kha morei masaalu, pilakha nathum khalattawui ningli machukkhuilu, kala kasaikha pamlu.

⁵ Khamashung pha̱kaphayā chigatlu, kala nathumwui shitkasang Proholi hailu.

⁶ “Iyavo, ithumna kaphā katheisi kaja chong! O Proho, nawui zakmai kahor ithumli chitheimilu!” da kahāng kachungkha lei.

⁷ Athumwui theishirai kala drakhāra̱ khavāt makhaleiwui ringkaphā chili lāngmeida, nana iningli khamathān sangmi.

⁸ Chingri eina I ngayaizangda pihaora, kaja O Proho, namāngna ili ning nganungkhung eina okthui ngasaka.