LAA 39 - Kathara Bible (BSI)

Kakhanang Miwui Ningkhangatei

¹ “Yangkashebing leilakha eina tangda, iwui shongfa ngasharlak eina zatra, iwui malena morei masā khavai ikhamor kafara” da ina hānga.

² I khak ngasha̱da kasaikha pama, ina chingri eina kapam aremana; iwui kachot mataimei,

³ iwuklung mei thāda sai. Ina phaningnganaopamda, mei yumhaowa; chieina ina imale eina matuida hānga:

⁴ “Proho, iwui khangachang atam chitheimilu, kala iwui mirin karankha leifakhala; imirin kayākha sha̱khala ili theingasakmilu!”

⁵ Yanglu, iwui atam nana pāngmayārankhamāng sāmi, kala nawui mikyanli iwui mirin atam khikha makhaning kathāna. Kachangkhatta, mi kachiva̱ khaksuikha kathāna.

⁶ Mi hiya kachangkhat eina akalā thāda zatung-zatva sai! Kachangkhat eina khikha makhaningwui vang athumna khananga; mina sorngasaida hai, kha khipāna chi kazipkhuirada matheimana.

⁷ Ara Proho, ina khili khangaraikhala? Iwui kachihān nawuili lei.

⁸ Iwui khayonkhamāng saikorawui eina kanshokmilu. Ili mangkhama̱bingwui mana̱shi khavai masā ngasakmilu!

⁹ I khak ngasha̱ya, ikhamor mamakāmana; kaja hi nana sāmi kahaina.

¹⁰ Ili kashao hi thahaimihaolu, napāng eina kashaona I kānhaira.

¹¹ Moreiwui vang nana mili hāngmachinda kakahar tharan, awui sakmeikap kaji lan makungna kazā thāda nana shimān ngasaka; kachangkhatta, mi kachiva̱ khaksuikhamaya!

¹² “O Proho, iwui seihā kasā nganāmilu, kala iwui khavao khanganāmilu; iwui chāra̱ katā mayangkheimihailu. Kaja ila ishāvā ngarā thāda nawui kha̱mi, ram kazata kathāna.

¹³ I kānthuida shimānchao majiranglakha, ringkaphā samphang khavai, ili khayangkheimilu!”