LAA 38 - Kathara Bible (BSI)

Kakhanang Miwui Seihā

¹ O Proho, nawui malungvāt eina ili makhararmialu, malungkangda ili mamachinmialu!

² Kaja nawui malāthing ili ngaphumhaira, kala nawui pāng iwuitungli tāshunghaira.

³ Nawui malungkhavāt chiwui vang, iphasāli kaching maleimana; iwui moreiwui vang ira̱kuili pangshap mazangthura.

⁴ Kaja iwui khayonkhamāng ikui kankāhaira; china otphun thāda iwui vang ritnāhaowa.

⁵ Iwui mangkhama̱wui vang iwui khamā torngataida nganamshihaira,

⁶ ikui mashunzangda ngakhumsangchaohaira; langpongda ina sifazata.

⁷ Kaja ikashan mei kachui thāda pemhaira, iphasāli kaching maleilakmana.

⁸ Iphasā ngazanhaida tāyānghaira, iningkachotwui vang ina ringngādalei.

⁹ Proho, iwui ningkachāng saikora nana theisera, iwui sitkhamahui nawui eina mathumhaimana.

¹⁰ Imalung tuktukhai, iwui yāng kānhaowa; imikwui kahor— chila iwui eina thuihaira.

¹¹ Iwui kazātwui vang eina ngasotnaobing, ngayurkazatabing katāva̱li thuihaowa; kala athei-asāla katāva̱li nganinga.

¹² Imanglā khuikhavai ili kaphābingna khalen sanga; ili chotkhavai phākazatbingna shimān khavai matui, kala yansai khavai langpongda machuka.

¹³ Kha iva khanā khangakhok thāda mashālakmana, khak khama̱ khamor makhamakā mi thai.

¹⁴ Mha, iva khangakhoka mi thai, khangasha̱ thada khamor mamakāmana.

¹⁵ Kha O Proho, ina nali ngaraili; O Proho, iwui Vare, ngahānkāmiki kaji chi nana.

¹⁶ “Iphei khanganai chitharan langkaso athumna iwuitungli mamathān ngasakmilu!” da ina seihā sali.

¹⁷ Kaja I kongluisangki jihaira, iwui khangashei ili leichingda lei.

¹⁸ Iwui khayonkhamāng hāngphatli, Iwui moreiwui vang I wukkhananga.

¹⁹ Maram maleila ili yangkashe athum panglaka, apong maleila ili yangkakharing athum kachungkhaya.

²⁰ Iwui kaphāwui vang makaphā kasābing chi iwui yangkashebingna, khikhalajila ina kaphā chili shurhaowa.

²¹ O Proho, ili mahormihaialu! O iwui Vare, iwui eina matāthuimihaialu!

²² O Proho iwui huikhame, ili thākta khangachonmilu.