LAA 37 - Kathara Bible (BSI)

Kaphaa eina Makaphaawui Akatang

¹ Makaphaawui vang wukmakhanangalu, khalāng kasā mili mayuishialu!

² Kaja athum thingnā thāda thākta shimānhaora, kala khawo thāda ngahuihaora.

³ Proholi shitsanglu kala kaphā sālu, chieina nana ram chili sompamra, kala ning tāphuphaira.

⁴ Proholi ningyāng unglu, chithākha ana nawui ningkachāng mira.

⁵ Nawui apong chi Proholi horsangmihaolu; ali shitsanglu, chithākha ana sāmira.

⁶ Nawui athut hāngkasang kahor thāda, kala nawui mashun ngashun thāda ana athut khuirāmira.

⁷ Prohowui mangāli chingrihailu, kala ali ning nganungkhun ngaraipamlu; mina awui apongli reikasang eina, makaphā arah kasābingwui vang makhanangalu!

⁸ Malung mavātalu, malungkathui chihohaolu! nakhalatta makhanangalu; china makaphāmāngli thānvai.

⁹ Kaja makaphā makhayāli katathaora; kha Proholi khangaraibingna ram chi samphangra.

¹⁰ Kasha̱kha leilaga, makaphā chi maleiluimara; awui pamli nana mathāda yanglala, ava chili maleisāmara.

¹¹ Kha khanimbingna ram chi samphangra, kala nganantāp okthuida ningyāng unglakra.

¹² Khangarongali makaphaana shimān khavai sai, kala awui ahā ali tarichithei;

¹³ kha Prohona makaphaali mana̱rora, kaja awui atam rārādalei da ana thei.

¹⁴ Makaphaana raighai sutkhui kala malā huna, kachāmkhangaibingli khuitā khavai, ngarongrik eina kazatbingli sāthat khavai;

¹⁵ athumwui raighai athum khalattawui malungli zangra, kala athumwui malāthing tekhaora.

¹⁶ Makaphaa kachungkhana mavātlakla khaleiliva, khangarongana kateokha khaleina phāmei.

¹⁷ Kaja makaphaawui pāng sātekmihaora, kha khangarongali Prohona yangmira.

¹⁸ Shāt makakābingwui zimiksho Prohona thei, kala athumwui shimlui mashimānda leira.

¹⁹ Makaphā atamli athumli makhayak ngasakmana, chāmrei atamli athumna mavātla leira.

²⁰ Kha makaphā chi shimānhaora; Prohowui yangkashebing chi wonnui katimwui tekhamatei kathāna; athum shimānra—meikhut thāda athum shimānhaora.

²¹ Makaphaana shukkhui, kala marunrarmana, kha khangarongava sailāmlaka kala mishoka;

²² Prohona somi kahaiya athum china ram chi samphangra, kha ana khonshi kahaibing chile katathaora.

²³ Miwui pheikār Prohowui einana, kala awui ningyāngkhaung apongli kazata chili ana sakāmi;

²⁴ ana kongluilala, mashoda mahortāmara, kaja Proho awui ngasāmkhui khavaina.

²⁵ I nganuisai, ara rarhaira; chithālala khangarongali horkahai ina matheilakmana, lah awui naongarā zāt pozākazatla matheimana.

²⁶ Ava mingairereo mi, kala chishuta; kala awui naongarābing sokhami ngasai.

²⁷ Makaphā horhaida kaphā sālu, chithākha na leichingra.

²⁸ Kaja Prohona mashunli leishiya, ana awui katharabingli mahorhaimara. Khamashung-khangarongbingli mashimān ngasaklakmara, kha makaphaawui naongarāli katathaora.

²⁹ Khangarongana ram chi samphangra, kala chili mashimānda pānra.

³⁰ Khangarongawui khamor eina thangkhamei tui matui; amale eina mashun tui hānga.

³¹ Varewui ain awui ningli hai, awui pheikār manganaithuimana.

³² Makaphaana khangarongali yangpama, kala ali sāthat khavai phāzata.

³³ Prohona ali awui pangshapli mahorsangmimara! lah ali bichar atamli khayon mamimara.

³⁴ Proholi ngarailu, kala awui apongli zatlu, chithākha ana ram chi samphang khavai nali sochikatra; nana makaphaawui kashimān chi theira.

³⁵ Makaphaa mina hennā kahai ina theihaira, kala Lebanonwui cedarthing mashonshei kahai thai,

³⁶ ina chi kānvaluishita, kala yanglu, a maleisāthuwa, ina phālala masamphangmana.

³⁷ Shāt makakā mili machutkhuilu, kala mashungrik kahai chili yanglu, kaja chingri kahai miwui mataikasang lei.

³⁸ Kha chonkhamakānbingli shimānchao ngasakra, makaphā miwui athei katathaora.

³⁹ Khangarongawui huikhami Prohowui eina samphanga; kakhanang atamli ana athumwui ngayin khavaina.

⁴⁰ Prohona athumli ngachonmi kala kanshokmi; makaphā makhayābingwui eina athumli ana kanshokta huimi; kaja athumna ali ngayinkhui.