LAA 36 - Kathara Bible (BSI)

Miwui Makhayā

¹ Chonkhamakānana makaphā-makhayaali awui kathuka wuklungli ngazeka; awui mikyanli Vareli khangachee chi maleimana.

² Kaja awui makaphā morei maphāshokrarmara kala mayangkharingmarada akhalatta chuilak eina sotmasaoya.

³ Akhamorwui tui makaphā eina mikhanamānga; ana thangmeida kaphā kasā maleiluimana.

⁴ Pilakha yankasai ot machukpi; khalatta makaphā shongfali zata; ana makaphāli mangakheimana.

⁵ O Proho, nawui makhangachei leikashi kazingram kāzoka, nawui ningkatong muiyā kāshunga.

⁶ Nawui khamashung-khangarong Varewui phungrei thai; kala nawui bichar thukkhamatai kathuka thai; O Proho, mila, sāyurla nana huikhui.

⁷ O Vare nawui makhangachei leikashi aman kayākha sakkhala! Miwui naomayarana nawui angachāng khaya̱li ngayinkhui.

⁸ Khavāt makhalei nawui shimli athumna phāshak-phāzai, kala nawui ningyāngkhaung kongwui tara̱ nana athumli mimanga.

⁹ Kaja nawuili kharinga ura̱ lei; nawui kahorlungli ithumna kahor thei.

¹⁰ O makhangachei leikashi chi nali katheibingli leichingranu, kala ning khangarongabingli nawui huikhami leichingranu!

¹¹ Kala lāngkasowui phei iwuitungli manairanu, makaphāwui pāngnala ili makashamhairanu.

¹² Makaphā kasābing ngakhumshām eina pizanga, athumli nursanghaida mangakarthuithukthura.