LAA 34 - Kathara Bible (BSI)

Varewui Kaphāwui Masot Kachikat

¹ Atam kachida ina Proholi sochikatra; ikhamorli awui masot kachigat leichingra.

² Prohowui mangāli imanglā lāngsoi; kakhanangabingna shālaga mathānranu.

³ O Proho mingli, ili ngasoda songarumlu, kala ithum ngarumda awui mingli masot misa.

⁴ Ina Proholi phāda ana ngahānkāmi, kala khangachee saikorawui eina ili kanshokmi.

⁵ Ali yangda horngasaklu, chithāda na mamaishimara.

⁶ Khangazana mi hina ngakaowa, kala Prohona shāmi, kala kakhanang saikora eina huimi.

⁷ Prohowui kazingraona ali khangacheebingli kuinama, kala athumli kanshokmi.

⁸ O Proholi mazapyangda awui kaphā theikhuilu! Ali khangayina mi chi ringphai!

⁹ O, katharabing, Proholi ngacheelu, kaja ali khangacheebing khavāt maleimana.

¹⁰ Kazingkha̱ anaola vāthaida thai; kha Proholi kapha mibing khamathā ot mavātmana.

¹¹ Ralu, O naomayara ngarā, ili nganālu, Proholi khangachee ina tamchitheira.

¹² Okpeishun eina ningyāngkhaung mirin sāngaiching kaje chi khipākhala?

¹³ Makaphā kala mikhanam tui namale, kala namorchaiwui eina mashok ngasakalu.

¹⁴ Makaphāwui eina pākhaida kaphā sālu, chingri kahai phālu, kala chi shurlu.

¹⁵ Khangarongabingli Prohona yangmi, kala awui khanāna athumwui khavao chi shāmi,

¹⁶ Makaphā kasābingli Prohona mamayāngaimana, okathuili athumli maphaningung khavai.

¹⁷ Ngachonmi khavai khangarongana khavao tharan Prohona shāmi, kala athumwui kakhanang saikorawui eina kanshokmi.

¹⁸ Malung sipkasābingli Prohona nganaimi, ningkathengbingli huimi.

¹⁹ Khamashungabingwui sipkasā kachungkhana, kha Prohona ali saikora chiwui eina kanshokmi.

²⁰ Prohona ali saikorali yangmida ara̱kui akhala matek ngasakmana.

²¹ Makaphāna makhayāli shaothatra; khangarongabingli yangkakharingabing athumli kashong lāngra.

²² Prohona awui raobingwui mirin ngatangkhui; ali ngayinkakhui khipālikha kashong malāngmara.