LAA 33 - Kathara Bible (BSI)

Masotlaa

¹ O khangaronga nathum, Proho mingli mathānlu! Mashungrik kahaile masot mingayia,

² Proholi tingteilā huida masot chikatlu, kala khara̱ tharā kakā tingteilā eina nimshimri laa sālu.

³ Ali laa kadhar sālu, panglāk eina vaoda tingteilā khara̱ huikazaklu.

⁴ Kaja Prohowui tui mashungrikhai; kala awui ot saikora ningtongda sākhui.

⁵ Ana khamashung khangarong eina mashunli leishi; okathui hili Prohowui makhangachei leikashina pemtinghai.

⁶ Prohowui tui eina kazingram sākhui, kala awui khaksui eina chili khalei ashangva̱ sākhui.

⁷ Liklili thaikahai thāda shamadru tara̱ katonga ana kazipkhui; ana kathukthuk chi kazipshimli kaziphai.

⁸ Okathui saikorana Proholi ngacheeranu, apuk-apagali khalei huptana awui mangāli ngacheerang eina nganingranu!

⁹ Kaja ana kahāng eina chithāda ngasāthuihaowa; ana kasoi, chieina nganingshinghaowa.

¹⁰ Miyurbingwui theithangkhamei, Prohona khikha makhaning ngasāngasaka; yurbingwui khangarān masāvai ngasakmana.

¹¹ Prohowui hāngkachithei mashimānda leichinga, awui ningwui kaphaning, mithot saikora vāpeichaowa.

¹² Proholi Vare sāda kakhui yur, awui shimluikat sākhavai, kapangkhui kahai mibing sokhami ngasaranu.

¹³ Prohona kazing eina yangtai, ana mibingwui naomayara ngarā saikorali thei;

¹⁴ ali chipam kahai wungpamkhong eina, okathuili kapam saikorali yanga,

¹⁵ mibingwui ning sangkhame ana, kala saikorawui otsak theisera.

¹⁶ Awungali awui shipai kachungna kankakhui maningmana, raikapingala awui yāng eina khayui maningmana.

¹⁷ Rai yuikhavaiwui vang rai siguili kachihān aremana; awui pangshap kharei chi eina mayuirarlakmana.

¹⁸ Yanglu, Proholi khangacheebingli, kala awui makhangachei leikashili kachihānabingli ana yangmi,

¹⁹ kaja athumwui manglā kathiwui eina ana kanshokmira, kala chāmrei atamli mathingasakmana.

²⁰ Ithumwui manglāna Proho wui vang honda lei, ana ithumwui ngachonkhame kala changveina.

²¹ Mha, ithumwui ning awui lungli mathāna, kaja awui katharaming chili ithum shitsanga.

²² Nawui makhangachei leikashi, O Proho, ithumna nali kachihān thāda ithumli tāshungmilu.