LAA 32 - Kathara Bible (BSI)

Ningkhangatei Kala Pheokhami

¹ Khayonkhamāng pheomi kahai, kala morei farormi kahai mi chi sokhamina.

² Prohona khayon makaphen, kala amanglāli mikhanam makhalei mi chi sokhamina.

³ Ina morei mahāngphathang, langpongda khangahuina iphasā shimāna.

⁴ Kaja ngashun ngayā iwuitungli napāng ritlak eina parhai; lumkachāngwui kasāwui vang thāda, iwui yāng thenghaira.

⁵ Nawui mangāli iwui morei sākahai I mayai, kala iwui khayonkhamāng mathumhaimana; “Proholi iwui khayonkhamāng hāngphatra” da ina hānga; chieina nana iwui khayon morei pheomi.

⁶ Chiwui vang shitkasanga mi kachiva̱na nali seihā sāranu; kakhanang atamli, tara̱ kaphong atamli athumna ali marāza̱rarmara.

⁷ Na iwui ngathum khavai pamna, kakhanangwui eina nana ili thummi; nana ili huikhami eina ili kuinammi.

⁸ Nana zatki kaji shongfa chi ina hāngchitheira kala tamchitheira; imikna yangmidai ina nali hāngchitheira.

⁹ Theithangkhamei makhalei sigui kala gadhā kathā mangasālu; athumle nārenra khalapmiphalungra maningkha nali mangayurzatmara.

¹⁰ Makaphā-makhayā miwui khangashei kachungkhaya; kha Proholi shitkasangale makhangachei leikashina kuinama.

¹¹ O khamashungbing, Proholi mathānda ringphalu, kala ningli mashungrik kahaibing, khamathānwui vang vaolu.