LAA 30 - Kathara Bible (BSI)

Ningkashi Khamiwui Seihā

¹ O Proho, ina nali masot mira, kaja ili khāngshokmihaowa, kala iwui yangkashebingli iwuitungli mamathān ngasakmana.

² O Proho iwui Varivara, ina nali khangachon poi, kala nana ili raimihaira.

³ O Proho, Kathewui ramwui eina imanglā nana khuishokmihaira, chomli vākahaibingwui ngachai eina imanglā kankhuimida ringngasaka.

⁴ O awui kathara nathum, Proholi masotlaa sālu, awui katharamingli ningshilu.

⁵ Kaja awui malungkhavāt hunkhamānga, kala awui ngahānkhangai mithot pei. Thangngayākhawui vang chapngachālapai, kha zingthan ngasha̱da khamathān ngasorai.

⁶ Iwui vanga, iwui nganantāp kahai atamli “I mangatha̱luimara” da hānga.

⁷ Nawui ngahānkhangai eina, O Proho, nana ili kapanga kaphung thāda sakāmihaira, namai ngathumhaiakha, I malungringhaowa.

⁸ O Proho, ina nali vaoli; kala Proholi ina kapo hina;

⁹ “Thihaida Chomli vāakha iwui tongkazā khi lei? Chifana nali masot mirala? China nawui ningkatong hāngmirala?

¹⁰ Nganāmilu, O Proho kala ili khalumashanmilu. O Proho, na ili ngachonkhame kasāmilu.”

¹¹ Iwui chapkhangachā, nana pheichak onngasaka; iwui borashi raimihailaga khamathān eina shānneira̱ neimi.

¹² Chieina imanglā kasaikha mapamla nali sochikatra. O Proho, iwui Vare, ina nali ningshichingra.