LAA 3 - Kathara Bible (BSI)

Anaomayara Absalomwui eina Khayām Atamli Davidwui Laa.

¹ O Proho, ili yangkashe mi kayākha leihao! Ili makhamayā kachungkha leihaira.

² Kachungkhana iwui maramli hānga, Varewuili awui vang khangachon maleimana.

³ Kha O Proho, na iwui kuikhamareiwui chāngveina, Iwui tekhamatei, ikui khangkākhamena.

⁴ Ina Proholi ngakaowa, kala ana kathara kaphungwui eina ili ngahānkāmi.

⁵ Ina ngayaizangda pi; Ina ngakarthuilui, kaja Prohona ili mayonmi.

⁶ Ili mamayāmada kuikhamarān athum mi thingtharā chili ina mangacheemana.

⁷ Ngakarthuilu, O Proho! Ili kanmilu, O iwui Vare! Kaja ili yangkashe saikorawui maisorli nana kapheya, makhayāwui ahābing nana shaotekmi.

⁸ Kankhami hi Prohowuina; nawui sokhami nawui yurbingwuitungli leiranu.