LAA 29 - Kathara Bible (BSI)

Siphan Zingrotli Proho wui Akhon

¹ Proholi mikharān milu, O kazingli khaleibing, tekhamatei pangshap Proholi mikharān milu.

² Amingwui tekhamatei Proholi milu, kathara sāri sāda Proholi khorumlu.

³ Prohowui khon tara̱tungli lei; Proho, tekhamateiwui Varena, hakkhamahā tara̱tungli ngashuma.

⁴ Prohowui khon pangshap leilaka, Prohowui khon ngamna pemtinghai.

⁵ Prohowui khonna cedarthing teka, Lebanonwui cedarthingla Prohona sāteka.

⁶ Lebanonli ana seinao thāda, kala Sirion kaphungli ramseinao thāda ngalong ngasaka.

⁷ Prohowui khonli meiwon shoka.

⁸ Prohowui khona lamhāng nganuka, Prohona Kadeshwui lamhāng nganuk ngasaka.

⁹ Prohowui khona shimrimthing ngayit ngasaka, kala ngahong ngaingasaka; kala awui khorumshimli saikorana, “Tekkhamatei” da vaosera.

¹⁰ Prohona khangaphaotungli munga; atam kachida awunga sāda Prohona wungpamkhongli pama.

¹¹ Awui mibingli Prohona pangshap miranu! Prohona awui mibingli chingri kahai eina somiranu!