LAA 27 - Kathara Bible (BSI)

Masotwui Seihā

¹ Proho iwui kahor kala ili huikhamena; ina khipāli ngacheerakhala? Prohona imirinwui raipanna; khipāli ina ngangrakhala?

² Makaphā kasā mina ili mamayāmada mashātlala; ili yuikashe kala yangkashebing chi pheingaphokta kongluira.

³ Rai ashangva̱ akhana mamayāmada ili rairum sālala, iningli mangacheemara; ili mamayāmada rai tālala, ining nganungkhunghaira.

⁴ Prohowui eina ot akha ina pokahai chiya, iwui mirin peida Prohowui shimli pamkhavai, Prohowui khamathā chi yangpam khavai, kala Khorumshimli ali phākhui khavaina.

⁵ Kaja kakhanang atamli ana ili awui ngayin khavaipamli thumira; awui kachonshimlungli fakhamida ili thumira, ana ili lunghār tungli khāngchipamra.

⁶ Ara ili kuinam kahai yangkashebingwuitungli ili mai kāngasakra; kala khamathān eina ngasoda awui kachonshimli ina pha̱kaphayā chigatra; Proholi nimshimri eina laa sāra.

⁷ Shāmilu, O Proho, ina khangakao tharan ili lumashanda ngahānkāmilu.

⁸ “Ili phalu” da nana hānga. Iningna, “Proho, ina phali” da nali hānga.

⁹ Namai iwui eina mathumhaialu. Nawui raoli malungvātta mahorhaialu, ili ngachonkhame chi nana. Ili machihomihaialu, ili mahormihaialu, O ili huikhame Varivara!

¹⁰ Kaja ishāva̱ ishāvāna ili horhailala, Prohona ili khāngkhuimira.

¹¹ O Proho, nawui apong ili tamchitheimilu; kala ashāt shongpongli thānzatmilu; khikhalajila iwui yangkashibingwui vang eina,

¹² iwui yangkashebingwui pāngli mahorsangmialu; kaja minama shākhibingna iwuitungli phena, kala athumna sākashi ot sai.

¹³ Kharingabingwui ramli, Prohowui phākhamatai ina theira da shitsanga!

¹⁴ Proholi ngarailu; kaping eina ngasoda malung zanglu; mah Proholi ngarailu!