LAA 26 - Kathara Bible (BSI)

Kaphā Miwui Seihā

¹ Ili mashun hāngsangmilu, O Proho, kaja ina iwui ningsā khangazip alungli zata, kala ina mangacheilakla Proholi shitsanga.

² O Proho, ili katamla tamyangda machutkakhuila sāyanglu, iwui wuklungla, ningla yangkhuilu.

³ Kaja nawui makhangachei leikashi iwui mangāli haida nali shitsangchaoda ina zata.

⁴ Makhamashung mili ina mangayurpamana, lah phakakhaningabinglila masakrumana.

⁵ Makaphā kasābingli khangayur ina yangkharinga, kala ina makhayā mili mangayurpamara.

⁶ Khayon makhalei theikhavai ipāng mazika, O Proho, nawui hanphutli kuimareizata,

⁷ ningkashiwui laa panglāk eina sāda nawui matakhak kahai otsak saikorawui pongli hāngzata.

⁸ O Proho, nawui pamkhavai shim, kala nawui tekhamatei leikhavai pam chili ina leishi.

⁹ Morei kaphungbing eina ashee ra̱kachangbingli ngasoda imanglā makhuithuimihaialu,

¹⁰ pāngli makaphā ara khangarānabing, yāpang pheisā kazā otna pemtingkahai athumli ngasoda.

¹¹ Kha iva iwui ningsākhangazip alungli zata; lumashanda ngatangkhuimilu.

¹² Ipheina ashātli nganinga, yarui ashangva̱ kakazipli ina Proholi sochikatra.