LAA 24 - Kathara Bible (BSI)

Reikhamatai Awunga

¹ Okathui kala chiwui alungli pemting kahai, apuk-apaga kala chiwui alungli khaleibing Prohowuisera.

² Kaja hi shamadrutungli ana sakā kahaina, kala kongtungli lingkā kahaina.

³ Prohowui kaphungli khipāna kārakhala? Kala awui katharapam chili khipāna nganingrakhala?

⁴ Apāng tharda khaleia, ning kathara, makānkhana otli awui manglāna makakahao, kala mikhanam eina ngasoda mamingkazaiapa china.

⁵ Prohowui eina ana sokhami samphangra, kala awui huikhame Varewui eina athut khuikhami chi samphangra.

⁶ Ali kaphā, kala Jacobwui Varewui mai kaphā athum chi chikathā mithotna.

⁷ O ngaveibing, nathumwui kui khangkālu! O achālakhawui khāmongbing, khangkālu! tekhamateiwui awungali zangvairanu.

⁸ Tekkhamateiwui awunga chi khipākhala? Prohona, kapanga kala sāshapa, rai mangāli sāshapa Prohona.

⁹ O ngaveibing, akui khangkālu! O achālakhawui khāmongbing, khangkā haolu! tekhamateiwui awungali zangvairanu.

¹⁰ Tekkhamateiwui awunga chi khipākhala? Ashangva̱wui Prohona, a tekhamateiwui awungana.