LAA 23 - Kathara Bible (BSI)

Proho Ithumli Homkhame

¹ Proho ili homkhamena, Ina mavātmara;

² ana ili wonui katimpamli ngayaipi ngasaka. Ana ili nimshimri kahai tara̱pamli thānvāmi;

³ ana imanglā shirinluishita. Amingwui vang, ana ili khamashung-khangarong shongfali thānzatmi.

⁴ Ina kathi khaya̱wui tampākli zatlala makaphā chili ina mangacheemana; kaja nana ili ngayurmi, nawui lijei kala khāmshuina ili ninglumngasaka.

⁵ Iwui yangkashebingwui mangāli nana ili kashakazā ngarānmi; ikuili nana thao neomi, iwui tengkot pemtha̱mi.

⁶ Makahatlākla khamathā kala lukhamashan china iwui mirin peichaoda ili shurzatra; Kala katang mavaila Prohowui shimli ina okthuira.