LAA 22 - Kathara Bible (BSI)

Ringkhangākhon kala Masotlaa

¹ Iwui Vare, iwui Vare. Ili khisāda horhaokhala? Ili mangachonmila, iwui ringkhangātuiwui eina khisāda chiyakha khalāthuihaokhala?

² O iwui Vare, ina ngashun ngakaowa, kha nana mangahānkāmimana, ngayā jiakha khangasām masamphangmana.

³ Kha nava katharana, Israelna sokachikata china.

⁴ Ithumwui avā ngarāna nali shitsanga, athumna shitsangda nana athumli kanmi.

⁵ Athumna nali ngakaowa, chieina kahui samphanga; athumna nali shitsanga kala ngachangkachat masamphangmana.

⁶ Kha iva kachaina, mi maningmana; saikorana makashita kala yurna ningkachai kahaiana.

⁷ Ili kathei saikorana ili mana̱shi; athumna ili khamor chipitta kui khanuka;

⁸ “Ana Proholi chihāna, chieina ali huimiraanu, ali kanmiranu, kaja ana awui lungli mathāna!”

⁹ Ili naopamwui eina khuishok khame chi nana; ishāva̱wui na̱ mangda leilakha nana nganaomi.

¹⁰ Ili kapharāwui eina thuida nawui pāngli horsanga; ili ishava̱na kapharāwui eina thuida na iwui Varena.

¹¹ Iwui eina matāmihaialu, kaja kakhanang kachot rārādalei kala ngachonmi khavai khipākha maleimana.

¹² Mukka kachungkhana ili rākuinama, Bashanwui mukkabingna ili kuinama.

¹³ Kathai kala khangang kapama kazingkha̱ thāda athumna ili khamor makāchithei.

¹⁴ I ngaleili tara̱ heikatā thāhaira, kala iwui ara̱kui saikora ngacheihaira; iwui wuklung khuira̱ thāhaira, iwui wuklungli menghaira,

¹⁵ iwui yāng hamkai thāda thenghaira, kala imalela makhāli ngashanghaira, nana ili kathiwui chifalungli chipethai.

¹⁶ Mha, fabingla ili kuimareida lei, makaphā sākhangarumabingna ili kuinamhaira; kala iphei ipāng khamā za̱mihaira—

¹⁷ Iwui ara̱-arā ina shānkhuishapa— athumna ili yangda mathāna;

¹⁸ iwui kachon athumna ngayara, iwui sāri kalā yangngaroka.

¹⁹ Kha O Proho na, iwui eina matāthuimihaialu! O iwui ngachonkhame, thākta kharāngachonmilu.

²⁰ Raikhaiwui eina imanglā kanshokmilu, iwui mirin fawui pangshap eina kankhuimilu!

²¹ Kazingkha̱ khamorwui eina ili kanmilu, ramsei angachiwui eina, imanglā kachot hi kanmilu.

²² Ichinā ngarāli ina namingwui pongli hāngmira; ashangva̱wui kakazipli ina nali masot chigatra;

²³ Proholi khangachee nathum, ali masot milu! Jacobwui naobing, ali tekmatei ngasaklu, Israelnao saikora, awui mangāli khayāshida nganinglu!

²⁴ Kaja ana kakhanangbingwui kakhanang chili, maningkachaimana lah mayangkharingmana; awui eina amai mathumhaimana, kha ana khavao tharan chi shāmi.

²⁵ Kahaka yarui kazipli iwui masotkhami nawui eina samphanga; nali khangacheebingwui mangāli iwui khangashit sāra.

²⁶ Chotchāng kahaibingna zāda thora; ali kaphābingna Proholi sochikatra! Nathumwui ning katang mavaila ringranu!

²⁷ Okathui akatang saikorana Proholi phaningungda ngareiungra; kala yur kachiva̱wui shimkhurna awui mangāli khorumra.

²⁸ Kaja khamungla Prohowuina, kala ana miyurbingwuitungli mungra.

²⁹ Mha, okathuiwui langkasobingna ali khuktida khorumra: Chifalungli kazangbing saikora, akhalatta maringkharar mi chila ali khuktida khorumra.

³⁰ Rākhanao thotna ali otram ngatha̱ra; mibingna khanuithotli Prohowui pongli hāngmaronra,

³¹ kala mapharārang kaje yurli awui kankhami tui phongchitheira, kaja ana hi khuirāmihaira. mibingna