LAA 21 - Kathara Bible (BSI)

Raiyotwui vang Masotlaa

¹ O Proho, awungana nawui pangshapli mathāna; kala nawui ngachon khamili ana kayākha mataida mathānhao!

² Awui ningna ningkachāng chi nana mihaira, kala awui morchai eina kapo chi nana makhalanmana.

³ Kaja nana ali mathālak kahai sokhami samphang ngasaka; akachanga sināwui kuihon akuili ngahonmi.

⁴ Ana mirin sangmei khavai poi; nana ali kasāngkha okkapei miya.

⁵ Nawui ngachonkhami mangā eina awui tekhamatei hakmahālaka; khayākakā kala ngam nana awuitungli heirormi.

⁶ Mha, nana ali mashimānda sokhami mataimeikapta mi, nawui ngasokhamiwui khamathān china, nana ali ringphā ngasaka.

⁷ Kaja awungana Proholi shitsanga; kala Juikhamataiyawui makhangachei leikashi mangā eina ana mangatha̱lakmara.

⁸ Napāngna nawui yangkashe saikorali phāshokra; nawui yāpangna nali yangkakharingbingli phāshokra.

⁹ Nana rākachithei tharan nana athumli meifa thāngasakra, Prohowui malungkhavātna athumli mayuisanghaora; kala meina athumli chuitāhaora.

¹⁰ Nana athumwui naothot, kala athumwui naongarā miwui naomayara ngarawui eina sāshimānra.

¹¹ Athumna nali makaphā sāngailala, athumna zakkashi khangarān sālala, chi maungshungmara.

¹² Kaja nana athumli yāmngasakra; athumwui maili nawui malāthing eina rinra.

¹³ O Proho, nawui yāng chili masot miranu! nawui pangshap chili ithumna laa sāra kala masot mira.