LAA 20 - Kathara Bible (BSI)

Raiyotwui vang Seihā

¹ Kakhanang samkaphang atamli, Prohona nali ngahānkāmi! Jacobwui Varewui ming china nali mayonmiranu.

² Katharapamwui eina ana nali ngachonkhami shirātranu; kala Zionwui eina nali ngachonmiranu!

³ Nawui kachigat saikora ana phaningungmiranu, kala nawui rikkatā pha̱kaphayā chi theimiranu.

⁴ Ana nawui ningkachāng mayāmiranu, kala nawui khangarān saikora ungshungmiranu!

⁵ Kala nawui khayui chili ithumna mathānda vaoranu, kala ithum Varewui mingli ithumwui philān khāngkāra! Nawui kapo saikora Prohona ungshung ngasakranu!

⁶ Awui thao neomi kahaia chili Prohona ngachonmira kaji ara ina thei; awui kathara kazingram eina ana ngahānkāmira, khayuiya yāpang eina ngasoda.

⁷ Kaikhana siguigariwui vang, kaikhana siguiwui vang langsoi, kha ithumna ithumwui Vare Prohowui mingli langsora.

⁸ Athum pitāda kongluihaora, kha ithum ngakarthuida nganingshinghaora.

⁹ O Proho, awunga chili khayui milu; ithumna kaho chitharan ngahānkāmilu.