LAA 19 - Kathara Bible (BSI)

Varewui Ots kala Ningkhami

¹ Kazingramna Varewui tekhamatei phongda lei, kala khamasaina awui themsak vaomalānmi.

² Ngashunna ngashunli hāngmi, kala ngayāna ngayāli awor chitheimi.

³ Tuimatui malei, tuikhurnilala mavai, athumwui khonla mashāmana.

⁴ Chithalala athumwui khon okathui saikorali peichaoda vāshunga, athumwui tui apuk-apagva̱ akatangli vāpei. Chiwui alungli zimikwui vang kachonshim sakai,

⁵ shakazā mayarana shimlungwui eina kashok thāda, kala kapanga mi akhana mathānthup eina shongzā khangakhui thāda yongzata.

⁶ Awui zatphok khavai kazing marei eina thui, kala kuikhamarei chiwui atang khavai angarit vāshunga, kala awui kasā chili khipākha mangathumpaimana.

⁷ Prohowui ain chiya ungshung vāshungchaowa, manglāli mathuk ngasaka; Prohowui hāngkahai mangapatlakmana, khikha makatheiyali thangmei ngasaka.

⁸ Prohowui acham-aram khamashungana, wuklung mathān ngasaka, Prohowui ningkhami mashungrikhai, mik mathing ngasaka.

⁹ Proholi khangachee kathar otna, mashimānda leichinga; Prohowui hukhumbing mashunga, kala khamashung-khangarongmānga.

¹⁰ Sināli lāngmeida hibingli ningchāngki kajina, akachanga sinālila mataimeida, khuira̱lila shimmeiya, kala khuihāng eina ngaya̱katā khuira̱lila shimmei.

¹¹ Chili lāngda athumna nawui raoli hāngmathina, chi khamayonli sāman kahaka lei.

¹² Kha khalattawui khangui theikhui kashapa khipā leikhala? Thumkahai khangui khalāng nana ili sāmathāmilu.

¹³ Morei sākhangai ningwui eina narao ili mayonmilu, chibingna iwuitungli mamung ngasakmialu! Chieina I shāt makāmara, kala hakkhamahā khayonkhamāng chiwui eina khayon maleimara.

¹⁴ Ikhamor eina kashokshok tui kala iwui ningli chukkhamaja̱, nawui mangāli khuisang kapai ngasā ngasakmilu, O Proho, iwui lunghār, kala ili ngatangkhame!