LAA 18 - Kathara Bible (BSI)

Davidna Khayuiwui Laa

¹ Ina nali leishi, O Proho iwui pangshapa.

² Prohona iwui lunghārna, iwui ngaveina, kala ili kankhamena, iwui Vare, iwui lunghār, ina ali ngayinkhui, iwui chāngvei, kala iwui huikhamiwui angajina, iwui raikānphungna.

³ Masot mikhangayi Proholi ina ngakaoda, yangkashebingwui eina ili huimi.

⁴ Kathiwui khara̱na ili rānnama, kashimānwui kongna ili kheizata.

⁵ Kazeiramwui khara̱li I neishāna, kathiwui khalenna ili ngasunga.

⁶ Iwui kakhanang tharan Proholi ina ngakaowa; ili ngachonmi khavai ina iwui Vareli vaowa. Awui khorumshimwui eina iwui khon ana shāmi, kala iwui khavao chi akhanāli vāshunga.

⁷ Chieina okathuina nganingda nganuka, phungreibingwui shimphungala kathirkazamda nganuka, khikhalajila a malungvāthaowa.

⁸ Anātangkhurwui eina meikhut shoka, akhamorwui eina meiwon shoka, malingting kahai meithā awui eina hānshoka.

⁹ Kazingram nemzang ngasakta ana tai; tangkhamang kashā chi awui pheizingli lei.

¹⁰ Ana cherub akhali tongda yonga, ana masiwui angachāngtungli thaklāk eina rai.

¹¹ Ana tangkhamang awui fakham khavai sai; leijui muiyā kashā eina tara̱ chi awui khaya̱larna.

¹² Awui mangāli horchāmri kahai chiwui eina, awui muiyāli kaishokta, theih eina meithā shoka.

¹³ Prohona kazingramlila ngashuma, kala Juimataimeikap kaji china kahāng eina, theih eina meithā shoka.

¹⁴ Kala ana awui malāthing chaiyang eina chihoshoka; rikhānla ana ngashei ngasakta athumli sākathāna.

¹⁵ Chiwui thili shamadruwui apong chi theihaowa, kala apuk-apagwui shimphungala ngahāhang eina theihaowa; O Proho, nana kakharar eina, na nātangkhur kakathang eina.

¹⁶ Kazing eina ngarāntāda ili yonkhui, tara̱ kachungkhawui eina ili khāngshokmi.

¹⁷ Ili yangshishun kahaibing, kala yangkakharingbing chiwui eina ana ili thānshokmi; kaja iwui vang athum hi pangnāhaowa.

¹⁸ Iwui unshimui atamli, athumna ili rāngasunga; kha Prohova iwui shaikhavaina.

¹⁹ Ana ili khamashā apamli thānshokmi, ana ili kanshokmi, khikhalajila ana ili ningyāng unglaka.

²⁰ Iwui khamashung-khangarongwui athishurda Prohona ili sāman mi, ipangwui kathar athishurda ana ili hanmiluira.

²¹ Kaja ina Prohowui ainbing chi mayona, kala ina zakshilāk eina Varewui eina mapākthuimana.

²² Kaja awui hukhumbing ina mayona, kala awui shiyan-chikān ina mahorhaimana.

²³ Awui mangāli I shāt makāmana, kala ikhalatta khayonkhamāngli mazangkhavai sai.

²⁴ Chiwui vang eina iwui khamashung athishurda, kala awui mikyanli ipāng kathar athishurda Prohona ili hanmi.

²⁵ Shitkasang khangatara chili nanala shitkasang khangatar chitheiya, shāt makakā chili nanala shāt makakānada chitheimi;

²⁶ Kathara chili nakhalattawui kathar chitheimi; makhangaronga chili nakhalatta makhangarong eina chitheimi.

²⁷ Kaje khangahuiabingli nana kanmi, kha hiksor kahai chili nana ngakhuntai.

²⁸ Mha, nana iwui thaomei shārkāmi; iwui Vare Prohona iwui tangkhamang horngasaka.

²⁹ Mha, nawui mangā eina ina raimibingli shimān ngasakshapa, kala iwui Varewui mangā eina ina phākhotungli yongkānshapa.

³⁰ Varewui apong chi ungpei-vāpeiya. Prohowui khangashit makahatlakmana da chitheimi; ana ali khangayina saikorawui changveina.

³¹ Kaja Vare chi khipakhala jiakha PROHO china? Ithumwui Vare maningla lunghār khipā leikhala?

³² Ili pangshap shaksākhame, kala iwui shongfa ningnganung khangasaka Varena.

³³ Ana iphei chaophei thāda sāmi, kala kajujuilila ili ning tāphup eina haimi.

³⁴ Ana ipāng rai ngarar khavai tamchitheimi, chieina ipangtheina eina pithraiwui malā hunshapa.

³⁵ Nawui huikhamiwui chāngvei chi ili mihaira, kala nawui yāpang eina ili ngachonmi, kala nawui khangachon chieina ili reingasaka.

³⁶ Iphei chonkhavai nana mashālak eina samida iphei manganaithuimana.

³⁷ Yangkashebingli kharomda ina ngaphankhui; athum mayumranglakha eina tangda masa̱naungmana.

³⁸ Ina rungphutm haida athum mangakarthuirarmana; athum ipheizingli saosanga.

³⁹ Kaja raiwui vang nana ili pangshap eina sāri shaksāmi; ili rākhangasungabingli ipheizingli pitā ngasaka.

⁴⁰ Yangkashebingli nana iwui eina ngareithui ngasaka, kala ili yangkakharingabingli ina sāshimāna.

⁴¹ Athumna kanmi khavai ngakaowa, kha huimi khavai khipākha maleisāmana, Proholi athumna ngakaowa, kha ana mangahānkāmimana.

⁴² Athumli ina shaokazamda masina phankazat chifa thāda sāmi; kala chanreiwui leipā thāda ina athumli kathantai.

⁴³ Mibingli ngarar khangarok chiwui eina nana ili khāngshokmi; nana ili yurbingwui akhavā sāngasaka; ina makathei yurna ili otram ngatha̱mi.

⁴⁴ Athumna iwui pongli shākhaleoda iwui kahāng nganai; yur kateibingna imangāli ngayumlaga rai.

⁴⁵ Yur kateibingna ningsuitai, kala athumwui raipanwui eina kathirriri rai.

⁴⁶ Proho kharingana, iwui lunghārli soranu, iwui huikhame Vare reimatairanu,

⁴⁷ ili athut hāngsangkhame Varena, ana mibingli iwui azingli leingasaka;

⁴⁸ iwui yangkashebingwui eina ana khāngshokmi, mha, yuikashebingwuitungli ili maiyā ngasaka; khangama̱-khangazai athumwui eina ili khāngshokmi.

⁴⁹ Hiwui vang O Proho, yur saikorawui alungli ina nali sochingra, namingli masotlaa sāra.

⁵⁰ Awui awungali hakkhamahā khayui chi ana mi, awui thao neomikahaiya, David kala awui ara̱-azālila awui makhangachei leikashi chitheimi.