LAA 148 - Kathara Bible (BSI)

Proho li Masot Mikhavai Haorihaorangli Khangahot

¹ Proholi solu! Kazingramwui eina Proholi solu! kajuiwui eina ali solu!

² Awui kazingrao saikora ali solu, ali solu, awui ashangva̱ saikora!

³ Zimikla, kachāngla, ali solu; kahora sirā saikora ali solu!

⁴ Juimeikap kaja kazingramla solu, kazingramwuitungli khalei tara̱la!

⁵ Athumna Proho mingli soranu! Kaja ana kasoda athumli sākhuiya.

⁶ Kala ana athumli katang makhavaiwui vang sākhui; athumwui leiret ana sāmi kahai chili makānshokrarmana.

⁷ Okathuiwui eina Proholi solu, ngayiwui sāyur kala kathuka nathum,

⁸ mei eina theih, horām kala phām, siphan-zingrot, awui ningkhami ungshung ngasaka!

⁹ Phungrei kala phungrā saikora, atheirong kala cedar saikora!

¹⁰ Sāyur kala sha̱kei saikora, ngawokazata yurbing, kala kapaia vānaobing!

¹¹ Awungabing kala okathuiwui mi saikora, wungnaobing kala okathuili khamunga saikora!

¹² Yaronnao ngalānao ngarumda, kasarnaola naoshinaola!

¹³ Athumna Prohowui mingli soranu; kaja amingmāngli khayā kakāna; awui tekhamatei okathui kala kazingli juimei.

¹⁴ Awui mibingwui vang ana angaji akha shokngasakhaira; awui katharabingwui vang solu, awui ngalemli khalei Israelnaowui vang. Proholi solu!