LAA 146 - Kathara Bible (BSI)

Huikhame Vareli Masotkhami

¹ Proholi sochikatlu! Proholi sochikatlu, O imanglā!

² I ringlakha eina tangda Proholi Ina sochingra; I manglā leilakha iwui Vareli masotlaa sāchingra.

³ Nawui ninglum wungnaobing, miwui naomayara ngarā, khangachon mamikhararra athumli mahaialu.

⁴ Awui khaksui pākthui kahai tharan a ngalei ngasāthuiluihaora; chithang awui khangarān shimānhaora.

⁵ Jacobwui Varivarali ngachonme sākhangasaka,

⁶ kazing eina ngalei kasaa, shamadru, kala chili khalei saikora; shitkasang leiching kaje;

⁷ rekakharek kahaibingwui vang mashun sākhame; kathaiali kashakazā mikazaa, awui Proholi kachina mi chi ringkaphana. Prohona narkahaibingli chihomi.

⁸ Prohona khangapheowui mik rakngasaka; Prohona khangazanabingli khāngmathotmi; khangarongali Prohona leishi.

⁹ Prohona ram kazatabingwuitungli yangmi, ana ra̱meinao kala avāva̱ makhalei naobingli nganaomi; kha makaphā makhayābingwui apong ana shimān ngasaka.

¹⁰ O Zion, nawui Proho Varena mashimānda thot kachida mungchingra.