LAA 145 - Kathara Bible (BSI)

Masot Khamiwui Laa

¹ Iwui Vare kala Awunga, Ina nali masot chikatra, kala namingli katang mavaila sochingra.

² Thangkachida ina nali sora, kala namingli katang mavaila sochikatchingra.

³ Prohohi hakmahālaka, kala hakkhamahā eina songayi, awui kharei chi mavāshungrarmana.

⁴ Thot akhawui eina khangatei akhali nawui otsak masot mimaronra, kala nawui pangshapa otsakbing phongmira.

⁵ Nawui khayākakā yāngla makakhui tekhamatei, kala nawui matakhak kahai otsak chili ina phaningchingra.

⁶ Nawui khangachee-khangachā otsak mibingna vaomalānra; kala nawui hakkhamahā ina hāngchitheira.

⁷ Nawui makhavāta kaphā mingkazat athumna vaoshokra, kala nawui khamashung khangarongwui laa panglāk eina sāra.

⁸ Proho lumashan leishitheilaka, malung mavātzarmana kala makhangachei leikashi mavātmana.

⁹ Proho saikorali phai, kala awui lukhamashan ana sākahai saikorawuitungli lei.

¹⁰ O Proho, nana sākahai ot saikorana nali ningkashi mira; kala nawui katharabing saikorana nali sora!

¹¹ Nawui wungramwui tekhamatei athumna matuira, kala nawui pangshapwui pongli hāngra;

¹² nawui hakkhamahā otsak mibingwui naomayara ngarāli chithei khavai; kala nawui wungramwui hāngkhavai makhalei tekhamatei chila.

¹³ Nawui wungram katang makhavai wungramna, kala nawui khamung thot kachida leichingra. Prohona hāngkahai saikora mangacheimana, kala awui kasāsā saikora lukhamashanmānga.

¹⁴ Kongluida khalei saikorali Prohona singkhāngmi, ngakhumsang kahai saikorali khāngmathotmi.

¹⁵ Nali saikorawui mikna yanga, kala nana athumwui kashakazā atam atamli mi.

¹⁶ Nana athumli kashap chi mi kala saikorawui kaphaning ungshungmi.

¹⁷ Prohova saikorali khamashung khangarong eina sai, kala awui kasāsā saikora lukhamashanmānga.

¹⁸ Ali khangakao saikorali Prohona nganaimi, ningkathar eina khangakao saikorali.

¹⁹ Ali khangachee saikorawui ningkachāng ana ngarānmi, ana athumwui khavao shāmi kala athumli huimi.

²⁰ Ali leikashe saikorali ana ngākmi; kha makaphā makhayāli ana shimān ngasakra.

²¹ Proholi ina masochikatchingra; asā khavai saikorana awui katharamingli mashimānda sochingranu.