LAA 141 - Kathara Bible (BSI)Ngazinshongwui Seihā 1 O Proho, nali ina holi, ili thākta rāmilu! Ina nali khangakao tharan nāshungmilu! 2 Iwui seihā kasā nganamkaphā ot thāda namangāli shānkhuimilu, kala ngazinshongwui pha̱kaphayā thāda ipāng khāngkakā! 3 O Proho, ikhamorli khamayona haimilu, imorchai khāmongli khamayonmilu! 4 Makaphā akhalinidala ining mayuithui ngasakmialu, morei otsak kasābingli ngarumda, makaphā otsakli I khalatta ngalangmazar ngasakmialu; kala athumwui zākapha mangkaphā chi mazā-mamang ngasakmialu! 5 Kaphā mina lukhamashan eina ili shaoranu lah machinranu, kha makaphā miwui thao ikuili maneomiranu; kaja athumwui makaphā chili mamayāmada ina seihā sāchinga. 6 Athumli yonngasaki kajibingwui pāngli horsangkhami tharan, Prohowui tui mashunga da athumna theikhuinaora. 7 Ngaleitungli lunggui shaokhaida ngapha̱ kahai thāda, athumwui ara̱kuila Kathewui ram khamorli yaoyānghaora. 8 Kha O Proho, Vare, imik nawuishong yangchinga; ina nali ngayinkhui khavai phai, ili kankhami makhalei thāda mahormihaialu. 9 Athumna iwui vang khalen sangkahai chiwui eina mayonmilu, kala makaphā kasābingwui khalenwui eina! 10 Ina yāmshokhaida, makaphā makhayā athum katonga khalattawui khalenli tāzangranu. |
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
Bible Society of India