LAA 140 - Kathara Bible (BSI)

Ngākmi khavai Seihā

¹ O Proho, makaphā miwui eina ili kakanmilu; kala sākashebingwui eina phārimilu,

² makaphā ningmāng phaningda, rai sāshon sāthai kajibingwui eina.

³ Athumwui male phara̱wui thāda zanngasaka; kala athumwui morchaizingli phara̱wui hu lei.

⁴ O Proho, makhayāwui pāng eina ili khamayonmilu; sākashi miwui eina ili phārimilu, iphei phatkhavai kasābingwui eina.

⁵ Hiksor kahaibingna ili khalen sanga, khara̱ rānlaga athumna mankhavai sai; shongfapheili iwui vang khalen sanghai.

⁶ Ina Proholi hānga, Na iwui Varena; iwui kapokhon hi khanganāsangmilu, O Proho!

⁷ O Proho, iwui Proho, iwui pangshapa kankhame, rai atamli nana ikui rommihai.

⁸ O Proho, makaphā makhayaawui ningkachāng mamialu, awui makaphā otsak mazatva ngasakalu!

⁹ Ili kuinam kahaibingna kui mangeikai, athumwui morchaiwui makaphā china athumli yuihaoranu!

¹⁰ Ngānda khalei meitha athumwuitungli tāranu! Athumli chomli horsangda mashokluiaranu.

¹¹ Mashātkazarbing ngalei chili maokthuiluiaranu; sākashi mili makaphāna thākmei rengthathaoranu!

¹² Ina thei kaja Prohona kakhanangabingwui athut hāngsangmi, kala khavātabingwui vang mashun mi.

¹³ Khangarongabingna kachāngkhat eina namingli ningkashi mira; mashungrik kahaiana nawui mangāli okthuira.