LAA 14 - Kathara Bible (BSI)

Mibingwui Makaphā

¹ Mangkhama̱ china awui ningli “Vare maleimana” da hānga. Athum chiya kateikazā, ningkakachai ot kasābingmangā. kapha kasa akhala maleimana.

² Thangkhamei otsak kasa, Vareli kaphā mi maleikhala da, Prohona kazingramwui eina miwui naobingli yangtai.

³ Athum saikora shongfa ma̱thuihaira, athum saikora kateizā ngaraichāsera; kaphā kasā akhala maleimana, maleimana, akhanidala maleimana.

⁴ Makaphā kasā saikora, athumna khamui kashai thāda iwui mibingli kashaibing athum awor maleithula, kala Proholi mangakaomala?

⁵ Chili athum ngacheekhailakhaora, kaja khamashungawui mithotli Varena ngasomi.

⁶ Nathumna kachāmawui khangarān pa̱ngapā ngasaka, kha Prohona awui ngayin khavaina.

⁷ Iyavo, Israelwui vang kankhami Zionwui eina rāsija! Prohona awui mibingwui lan hanmiluishit kaji tharan, Jacobna mathānra, kala Israelna ringphāra.