LAA 139 - Kathara Bible (BSI)

Varena Tongtingda Kathei kala yangkhami

¹ O Proho, nana ili kapeoyangda theihaira!

² Ina pamlala kala nganinglala nana thei; katāva̱wui eina iwui ning nana thei.

³ Iwui shongfa kala pikhavaila nana phāshokhuiya, kala iwui otsak saikora theisera.

⁴ Imaleli tui akha eina tangda mahangranglakha, yanglu, O Proho, nana chi theiserhairasai.

⁵ Khanuklila shingālila na lei, kala napāng iwuitungli haimi.

⁶ Hikatha thangkhamei hi iwui vang tekmateinai; hi juināhaida I makāshungrarmana.

⁷ Nawui Manglāwui eina I kali thuirakhala? lah na ngalemwui eina I kali yāmvārakhala?

⁸ Ina kazing kālala na chili lei! Ina Kathewui ramli pet semlala na chili lei!

⁹ Ina ngathor yāmda shamadruwui akatangli pamlala,

¹⁰ chilila napāngna ili thānmira, kala nawui yāpangna ili singmira.

¹¹ Kalikha ina, “Tangkhamangmāngna ili farorhaida, ili kuikhamarei kahorla ngayāhaoranu,” da hānglala,

¹² tangkhamang chieina tangda nale matangmangmana, ngayāla ngashun thāda hora; kaja tangkhamangla nawui vanga kahorna.

¹³ Kaja iwui alungshongla nana sai, ishava̱wui naopamli nana ili ngarumda sākazakzak kahaina.

¹⁴ Ina nali masochikatli, kaja nava khangachee kala matakhak kahaiana. Nana sākahai matakhakhai! Nana ili theitithaiya;

¹⁵ ngathumda ili kasā tharan, iphasā nana theisera; okathui kathukawui alungli, ningmanolak eina sākakhuina.

¹⁶ Izak mashokranglakha namikna theiserhairasai; otsak kachiva̱ nawui lairikli kapihairasai; iwui vang semmi kahai atambing saikora chi masemranglakhala.

¹⁷ O Vare, nawui ninglan iwui vanga kayākha aman sakkhala! Saikora chi kaziplaga kayākha khamashā!

¹⁸ Ina shānsi kaja chi situili chungmeira. Ina thuikhamathuk tharan, nana ngayurmisai.

¹⁹ O Vare, makhayā mili nana sāthathaosi kaja, kala asheewui mi chi iwui eina pākthuihaosi kaje jong,

²⁰ nali zakkashi sāngailak eina ngakaikashibing, makaphā sākhavaiwui vang athum khalatta nali ngakaikashi mibing!

²¹ O Proho, nali yangkakharing athumli ina mayangkharingmala?

²² Ina athumli kachangkhat ningkachai, Ina athumli yangkashena da shānkhui.

²³ Kapeoyanglu O Vare, iwui wuklung theimilu! Chāng yangda iwui ninglan theimilu!

²⁴ Kala iwui alungli makaphāwui apong maleikhala yangmilu kala katang makhavai apongli kathānmilu.