LAA 138 - Kathara Bible (BSI)

Ningkashiwui Seihā

¹ O Proho, ining tongda nali ningkashi mili; varebingwui mangāli ina nawui masotlaa sai;

² Nawui makhangachei leikashi kala ningkatong chiwui vang, nawui kathara shimshong khorumda namingli ningkashi mi; kaja nana saikorawuitungli naming kala nawui tui china khayākai.

³ Ina ngakaothang, nana ili ngahānkāmi, imanglāwui yāng nana mataisangmi.

⁴ O Proho, okathuiwui awunga saikorana nali masochikatra, kaja athumna nakhamorwui tui shāhaira;

⁵ kala Prohowui apongli athumna laa sāra, kaja Prohowui tekhamatei reimatailaka.

⁶ Kaja Proho chi reikhamataiyana jilala, khangazanabingli ana phaningmi; kha lāngkasobingli ana katāva̱ eina yanga.

⁷ Ina kakhanangwui alungli zatlala, imanglā nana phārimihai; iwui yangkashebingwui malungkhavātli napāng katingshoka kala nawui yāpāngna ili kanshokmi.

⁸ Prohona ili sāngasakhangai chi ana ungshungmira, O Proho nawui makhangachei leikashi katang mavaimana. Napāng eina sākhui kahai chi mahormihaialu.