LAA 137 - Kathara Bible (BSI)

Raithā kahaipamli Israelnaobingwui Chapkhangachā

¹ Babylon kong ngalemli ithumna pamzanga, chili Zion phaningkhaung tharan ithumna chapa.

² Chiwui shumthingtungli ithumwui tingteila hokthānghai.

³ Chili ithumli tukkakhuabingna, thumli laa sālu ji, kala ithumli rekakharekabingna ngashan sānganao khavai; “Zionwui laa akha ithumli sāchitheilu” da hānga.

⁴ Prohowui laa kathāda ithumna mi ngaleili sāpaira?

⁵ O Jerusalem, ina nali malaihaiakha, iwui yāpang thihaoranu!

⁶ Imale akārakli ngavepshanhaoranu, Ina nali maphaningakha, Jerusalem iwui vang ringphāmeikap kajena da makhuiakha!

⁷ O Proho, Edomnaobingna sākahai, mathāhaila phaningungmilu; Jerusalem khuithang athumna, “Chi shaokhaitālu, chi shaokhaitālu! apam tāshungngasaklu!” da kahāng chi.

⁸ Sakakathānva̱, O Babylonwui naongalāva̱! Nali athut kakhui a chi ringphāra, ithumli sākahai chiwui vang!

⁹ Nawui kateoabingli khuilaga lungguili ngaphitkashānbing chi ringphāra!