LAA 135 - Kathara Bible (BSI)

Masotkhami Laa

¹ Proholi sochikatlu, Proho mingli sochikatlu, O Prohowui raobing, masochikatlu,

² Prohowui shimlungli khanganinga nathum, Varewui yāngkhuplungli khaleibing!

³ Proholi solu, kaja Proho kaphaana; amingli laa sālu, kaja a lumashankathana!

⁴ Kaja akhalattawui vang Prohona Jacobli kapangkhui, Israelli awui vang sākhangasak thāda.

⁵ Kaja Proho khareianada ina thei, kala ithumwui Prohona varebing saikorawuitungli lei.

⁶ Prohona ana ningyāngkhaung chi sai, kazingramlila, okathuilila, shamadrulunglila, kathuk saikoralila.

⁷ Okathui akatang eina muiyā ngasuikā khangasak, kazing rokhavai rikhān ngashei khangasak; awui kazip khavai chikhurwui eina masi phankhangasaka chi alaka.

⁸ Egyptwui naochizai, mi kala sā thikhangasaka chi ana;

⁹ O Egypt nawui alungli, Pharaoh kala rao saikorawuitungli, matakhak kahai kala khamachut chihorai,

¹⁰ miyur kachungkha sāthata kala kapangpanga wungnao shaothata,

¹¹ Amorwui awunga Sihon, Bashanwui awunga Og, kala Canaanwui wungram saikora,

¹² kala awui mi Israeli shimluikat sāda athumwui ngalei shimluikat sāda mi.

¹³ Naming, O Proho, leichingra, O Proho, naming kazat, thot saikora vāshungra.

¹⁴ Kaja Prohona awui mibingli athut khuimira, kala awui raobingli lumashanmira.

¹⁵ Miyurbingwui varebingva pāng eina sākakhui lupāsā eina sinana.

¹⁶ Athum khamor kai, kha mamatuipaimana; athum amik kai, kha athum matheirarmana,

¹⁷ athum khanā kai, kha athum mashāmana; lah athumwui khamor eina khakla masuimana.

¹⁸ Athumli sākakhuabing chila athum tharanu! mha, athumli shitkasanga kachiva̱.

¹⁹ O Israelwui shimkhur, Proholi solu!

²⁰ O Aaronwui shimkhur, Proholi solu! O Leviwui shimkhur, Proholi solu! Proholi khangachee nathum, Proholi solu!

²¹ Zionwui Proholi solu, Jerusalemli kapambing, Proholi solu!