LAA 129 - Kathara Bible (BSI)

Israelwui Yangkasheli Makhamayā Seihā

¹ “I yaronlakhawui eina athumna ili khanang ngasaka,” ara Israelna hāngranu—

² “I yaronlakhawui eina athumna ili khanangngasaka, kha athumna ili mayuirarmana.

³ Seiot kasingana iwui akhumli okkaithing eina tāka; tinkhur kasāngkha harkhui.”

⁴ Proho katharana; makhayābingwui khara̱ ana sāshatmihaira.

⁵ Zionli yangkakharing saikora khayakta ngalanhaoranu.

⁶ Athum shimtungli kaphor khawo mahaksangranglakha ngahuitheng kahai chithāhaoranu,

⁷ chikathā china mā kahātnaowui pāng machipemmana; lah mā khavamnaona mavamkhuimana,

⁸ Kala chili vākakānbingnala, “Prohowui sokhami nawuitungli tashungmiranu! Prohowui ming eina ithumna nali sokhamina” da mahāngmana.