LAA 121 - Kathara Bible (BSI)

Ithumli Ngākkhame Proho

¹ Ina imik kaphungli ngashānkai. Iwui khangachon kachi eina rārakhala?

² Iwui khangachon Prohowui eina rai, kazing eina ngalei kasaa chi.

³ Naphei ana mangatha̱ ngasakmara; nali mayonkhame chi mapivāmara.

⁴ Yanglu, Israelli mayonkhame chi, masingutmara, kapila mapivālakmara.

⁵ Prohona nawui mayonkhamena; nawui yāshong Prohona nawui khaya̱ sami.

⁶ Ngashun zimikna lah ngayā kachāngnala mashaoreo ngasakmara,.

⁷ Prohona makaphā saikorawui eina mayonmira, ana nawui mirin mayonmira.

⁸ Prohona nawui khaung khavā arui atam eina thuida katang mavaila mayonmira.