LAA 12 - Kathara Bible (BSI)

Ngachonmi khavai Seihā Kasā

¹ Ngachonmilu, Proho, kaja kathara akhala maleithura; kaja shitkasangabing miwui naomayara ngarawui eina shimānserhaira.

² Mi kachiva̱ awui khongnaili kapika; khamorli sotmasaolaga ning khani sāda matui.

³ Sotkhamasao morchai, kagapik-kakhayanga male chi Prohona rimtamiranu;

⁴ “Ithumwui male hieina ithumna yuira, ithumwui morchai ithumwuli kai, ithumwui akhavā khipā leikhala” da kahāngabing chilila rimtāmilu.

⁵ “Khikhalajila kachāmali ngaponmihaoda, khikhalajila khavātana ringngāhaoda, I ara ngakarthuiura” da Prohona hānga, “Ana ningkachānga ning tāphup kahaipam chili ali ina haimira.”

⁶ Prohowui ngashit kahai chiya kathara tuingashitna; sharkha̱li shini shida mathing ngasak kahai lupāsā kathāna.

⁷ Nana kha-ngākmilu, O Proho, mithot hiwui eina thuida ithumli mayonmilu.

⁸ Makaphā chili mibingwui naomayara ngarāna khangmasothaoda, kuimareida makaphā kasābingna zata.