LAA 116 - Kathara Bible (BSI)

Kathiwui eina Kanmi kahai Kachikathana Vareli Masotkhami

¹ Ina Proholi leishiya, khikhalajila iwui akhon kala kapo ana shāmi.

² Khikhalajila ana ili nāshungmihaoda, chiwui vang ina ringlakha eina tangda ali ngakaochingra.

³ Kathiwui khalenna ili kuinama, Kathewui ramwui kachotna ili singkhuida, I kakhanang sikafa samphanga.

⁴ Chieina ina Prohowui mingli ngakaowa: “O Proho ina nali kapona, imanglā kahuimilu!”

⁵ Prohohi lumashankatha̱a kala khangarongana; ithumwui Vare lumashantheilaka.

⁶ Ichachamabingli Prohona pharimihai, I kalākashi tharan ana kanmi.

⁷ O imanglā, latunglu, nawui ngasām khavaili; kaja Prohona nali mavātlakla sāmihaira.

⁸ Khikhalajila kathiwui eina nana imanglā kanshokmihaira, imik charāwui eina, iphei khangaphokwui eina;

⁹ kharingabingwui ramli, ina Prohowui mangāli yaothui,

¹⁰ “I chotmatailakhaira” da ina kahāng tharanlila iwui shitkasang leichinga.

¹¹ Ina malungkharing lungli, “Mikumo hi aremawui chihan khavaina” da hānga.

¹² Ili ana sākhami saikorawui vang, ina Proholi khi runra̱khala?

¹³ Huikhamiwui tengkot ina khāngkāra kala Prohowui mingli ngakaokāra.

¹⁴ Awui miyurwui ngachaili, ina ngashit kahai chi Proholi mira.

¹⁵ Prohowui mikyanli aman kasak hiya awui katharabing kathi hina.

¹⁶ O Proho, I nawui raona; I naraona, narao sha̱naowui naomayarana. Ili khalap kahai nana khalāmihaira.

¹⁷ Ningkashiwui pha̱kaphayā ina nali chigatra, kala Prohowui mingli ngakaora.

¹⁸ Awui miyur saikorawui mangāli ina khangashit chi Proholi mira.

¹⁹ Prohowui shim kayāngli, nawui alungli, O Jerusalem. Proholi solu.