LAA 115 - Kathara Bible (BSI)

Akhamāng Kaje Khamashunga Vare

¹ Ithumli maningla, O Proho, ithumli maningla, kha tekhamatei namingli miranu, nawui makhangachei leikashi, kala nawui ningkatongwui vang!

² “Athumwui Vare kali leikhala” da yurbingna khi hāngkhavai lei!

³ Ithumwui Vare kazingli lei; awui ningkachāng athishurda ana sai.

⁴ Athumwui varebingva sinā lupāsāna, miwui pāng eina kasāna.

⁵ Athum khamor kai, kha mamatuimana, mikla kai, kha matheimana.

⁶ Athum khanā kai, kha mashāmana; nātangla kai, kha manganamana.

⁷ Athum pāng kai, kha sākaza̱ matheimana; pheila kai, kha mazatpaimana; kala athumwui kharokli akhonla mashokmana.

⁸ Athumli sākakhuibing chi athum tākamhai; chili shitkasangbingla chipapama.

⁹ O Israel, Proholi shitsanglu! Ana athumwui ngachonkhame kala chāngveina.

¹⁰ O Aaronwui shimkhur, nathumwui shitkasang Proholi hailu! Ana athumwui ngachonkhame kala chāngveina.

¹¹ Proholi khangachee nathum, Proholi shitsanglu! Ana athumwui ngachonkhame kala chāngveina.

¹² Prohona ithumli mamalailakmana; ana ithumli somira; ana Israelwui shimkhurli somira; Aaronwui shimkhurli somira;

¹³ Proholi khangachee athum khareilila kateolila khaninili ana somira.

¹⁴ Prohona nathumli mataisangmiranu, nathum kala nathumwui naongarāli!

¹⁵ Kazing ngalei kasaa Prohona, nathumli somiranu!

¹⁶ Kazingram Prohowui kazingramna, kha okathui ana mibingwui naomayara ngarāli mikahaina.

¹⁷ Kathibingna Proholi mamasochikatmana, kazeiram zangkahaibingnala.

¹⁸ Kha ithumna Proholi sora, arui eina thuilaga katang eina tangda. Proholi solu!