LAA 113 - Kathara Bible (BSI)

Proho wui Kaphāli Masotkhami

¹ Proholi solu! Solu, O Prohowui raobing, Proho mingli solu!

² Arui eina thuida katang mavaila, Proho mingli soranu!

³ Zimik kashok eina thuida katun eina tangda, Prohowui mingli sochikatra!

⁴ Yur saikorawuitungli Proho lei, kala awui tekhamatei kazingramli juimei!

⁵ Atungshong pamda khalei, ithumwui Vare Proho kathā khipā lei,

⁶ kazingram eina okathuili ngashāntāda khalei ali?

⁷ Chifawui eina ana kachāmabingli khāngkhui, kala hotlāpamwui eina khavātabingli khāngkhui,

⁸ athumli wungnaobingli ngasoda pamrum khavai, awui mibingwui wungnaobing eina.

⁹ Naokashumva̱li ana shim mi, ali naongarābingwui khamathāna ava̱ sāngasaka. Proholi solu!